Sigismundus, Dei gracia Romanorum rex semper augustus ac Hungarie, Croacie etc. fideli nostro dilecto, venerabili et religioso domino Demetrio, abbati monasterii Sancti Aniani de Tikonio, salutem et graciam. Ex porrecta honorabilis domini Nicolai Georgii de Nariag, canonici ecclesie Wesprimiensis, in personis honorabilium virorum dominorum capituli eiusdem ecclesie Wesprimiensis didicimus, quomodo vos quarundam bullarum et litterarum apostolicarum, pridem per quosdam nostros regnicolas in Constancia a condam Ioanne papa vigesimo (tercio) per maiestatis nostre voluntatem et in predictorum regnorum nostrorum ecclesiarum preiudicium et destruccionem impetratarum, quas quidem bullas et litteras apostolicas nos per fatum Constanciense concilium procuravimus revocari, vigoribus decimas et quartas decimarum, ad prefatum capitulum et ecclesiam Wesprimiensem predictam iure pertinentes, pro vobis et vestro monasterio occupassetis et accepissetis contra predicti sacri Constanciensis concilii revocatorias litteras, quibus mediantibus prefate bulle et littere apostolice revocate fuere, et eciam contra nostras regias litteras, quibus universis et singulis dictorum regnorum nostrorum regnicolis, ne ipsi aut eorum aliquis sepefatis bullis et litteris apostolicis uti presummeret, commisisse et mandasse recolimus in prelibati sacri Constanciensis concilii et nostre constitucionis contemptum multum gravem. Cum autem nos prefatum capitulum et antedictam Wesprimiensem ecclesiam premissis decimis et quartis decimarum gaudere, uti velimus, prout ab antiquo eisdem uti fuerunt, igitur vestre fidelitati regio sub edicto precipimus et mandamus, quatenus sepetactas decimas et quartas decimarum, pro vobis et vestro monasterio predicto, ut premittitur, occupatas, usurpatas et acceptas, sepedictis capituli et ecclesie Wesprimiensi plenarie et integre reddentes et restituentes, vos de eisdem per amplius nequaquam intromittere nec de cetero predictis bullis quomodolibet uti presumpmatis, aliud non facturi in premissis, prout graciam nostram regiam obtinere et perpetuam nostram indignacionem desideratis evitare. Alioquin aliarum et eciam presencium litterarum nostrarum regalium seriebus fideli nostro dilecto, reverendissimo in Christo patri domino Ioanni, archiepiscopo Strigoniensi, aule nostre Romanoregie summo cancellario necnon regni nostri Hungarie vicario generali, per nos constituto, aut, eo absente vel aliis nostri et regnorum nostrorum negociis insudantibus, venerabili domino dicte ecclesie Strigoniensis vicario in spiritualibus generali constitutis et constituendis commisimus et committimus, ut ipsi contumacia et rebellione vestris crescentibus et mandata nostra regalia presencia vobis contemnentibus vos ad premissa facienda eciam, si opus fuerit, per vestrarum et dicti monasterii vestri possessionum occupacionis necnon alia opportuna remedia compellant et adstringant. Presentes eciam post earum leccionem semper reddi volumus presentanti. Datum in civitate Landoniarum in regno Anglie in festo Sancti Laurencii martiris anno Domini millesimo quadringentesimo decimo sexto, regnorum nostrorum anno Hungarie etc. trigesimo, Romani vero sexto. [1416. aug. 10.]