Alexander episcopus servus servorum Dei dilecto filio Matheo abbati monasterii Sancti Martini Sacri Montis Pannonie [Ordi]nis Sancti Benedicti Iauriensis diocesis salutem et apostolicam benediccionem. Cum nos hodie monasterio Sancti Martini Sacri Montis Pannonie Ordinis Sancti Benedicti Iauriensis diocesis tunc certo modo vacanti de persona tua nobis et fratribus nostris ob tuorum exigenciam meritorum accepta de fratrum eorundem consilio apostolica auctoritate providerimus preficiendo te illi in abbatem, prout in nostris inde confectis literis plenius continetur, nos ad ea, que ad tue commoditatis augmentum cedere valeant favorabiliter intendentes tuis supplicacionibus inclinati tibi, ut a quocunque malueris catholico antistice graciam et communionem apostolice sedis habente munus benediccionis recipere valeas ac eidem antistiti, ut illud auctoritate predicta impendere licite tibi possit plenam et liberam harum serie concedimus facultatem. Volumus autem, quod idem antistes, qui tibi prefatum munus impendet, postquam illud tibi impenderit, a te nostro et Romane ecclesie nomine fidelitatis debite solitum recipiat iuramentum iuxta formam, quam sub bulla nostra mittimus introclusam ac formam iuramenti, quod prestabis, nobis de verbo ad verbum per tuas patentes literas tuo sigillo munitas per proprium nuncium quantocius destinare procures, quodque per hoc venerabili fratri nostro episcopo Iauriensi, cui monasterium ipsum ordinario iure subesse dignoscitur, nullum imposterum preiudicium generetur. Datum Rome apud Sanctum Petrum, anno incarnacionis dominice MD, quartodecimo Kalendas Octobres, pontificatus nostri anno nono. [1500. szept. 18.]