Universis et singulis Christifidelibus presentes visuris, lecturis, pariter et audituris capitulum ecclesie Strigoniensis salutem in eo, qui est omnium vera salus. Notum facimus, quod nonnulli ex religiosis fratribus monasterii Sancti Martini de Sacro Monte Pannonie parcium regni Hungarie, Iauriensis diocesis in nostri accesserant presenciam declarantes nobis, qualiter quidem reverendus pater et religiosus frater dominus Matheus abbas dicti monasterii diabolo, ut traditur, humani generis inimico et omnis boni invido persuasus medio quorundam fratrum malorum, qui nuper ordines suos apostataverunt et licenciosi ac voluptuosi vivunt et regularem observanciam postposuerunt et eorum superioribus se inobedientes reddiderunt, apud sanctam sedem apostolicam et sanctissimum dominum nostrum papam de diversis, non quidem veris, sed omnino falsis criminibus accusatus esset et delatus, propter que idem sanctissimus dominus noster papa instanciam presentavit fiscalis dicte sedis apostolice iuxta articulos inde formatos ipsi domino abbati in propria persona sua et non per procuratorem aut excusatores sub gravissimus penis et compare comisset et mandasset. Et quia ipse dominus abbas nunquam usu equitandi habuisset et alias esset adeo debilis fragilisque nature, ut, si pedibus curiam Romanam versus iter arripiat, speciale periculum persone sue evadere non posset. Supplicatum fuit itaque pro parte eorundem fratrum, ut de vita, moribus, conversacione, religione et fama ipsius domini Mathei abbatis apud dictam sedem apostolicam et alibi, ubi opus esset, in quantum nobis constat, tesimonium ferre et eius innocenciam, excusare dignaremur. Nos vero, qui unicuique petenti iusticiam obligati summus et ea attestari, que veritate subnixa fore videntur, duximus ac testemur et in puritate consciencie nostre, qua Deo obligamur, fatemur, quod dictus dominus Matheus abbas non solum nunc existens, religiosus, sed eciam tunc, quando habitum gerebat secularem erat bone vite et bone fame ita, ut et tunc merito monachus dici potuisset. Nunc vero factus monachus ita cepit esse religiosus, ut sanctam ducat vitam, ut velut speculum orbis omnium religiosorum antepositus est, solus existens in Hungaria, qui religionem Ordinis Sancti Benedicti a multis annis labefactatam et in procliva voluptatum prolapsam totis viribus conatus reformare et in viam vere institucionis eiusdem Beatissimi patris Benedicti et observancie regularis reducere. He itaque de ipso domino fratre Matheo abbate attestamur et possumus profiteri. Et ne alicui de his dubitari contingat, presentes exinde fieri nostrique sigilli fecimus impressione communiri. Datum ?||
Aljára ez van írva: Annus deest, verum cum in codice illo bibliotece v. capituli Posoniensis, ex quo instrumentum hoc depromptum est pleraque talia contineantur, que circa annum MDX gesta sunt, hoc quoque documentum ad tempus illud referri debet, precipue cum totus codex evi illius charactere exaratus sit. Codex autem in tabula exteriori antiqua manu hunc habet titulum: Stilus fori ecclesiastici Mathei Benezthy. Est autem inter Iuridicos nro 154 signatus.