[Krisztus monogramja] nomine domini Dei summi. Stefanus superna providente clementia Ungrorum rex. Credimus et vere scimus, si locis divino cultui mancipatis potestates atque honores adagmentaverimus, id non solum laude humana predicandum, verum divina mercede remunerandum. Quo circa omnium sanctae Dei aecclesiae fidelium nostrorumque presentium atque futurorum sollers comperiat intentio, quod nos interventu, consilio et consensu domni Anastasii abbatis de monasterio Sancti Martini in monte supra Pannoniam sito, ab genitore nostro incepto, quod nos per Dei subsidium, ob anime nostre remedium, pro stabilitate regni nostri ad finem perduximus, talem concessimus libertatem, qualem detinet monasterium Sancti Benedicti in monte Cassino; quia propter orationes sanctas fratrum eiusdem monasterii, consiliante domno Anastasio prescripto abbate, et iugiter adiuvante, confortati et laureati sumus. Singulare namque sufragium, quod per merita Beati Martini in puericia mea expertus sum, memoriae posterum tradere curavi. Ingruente namque bellorum tempestate, qua inter Theotonicos et Ungaros seditio maxima excreverat, precipueque cum civilis belli ruina urgerer, volente comitatu quodam nomine Sumigiense paterna me sede repellere, quid fluctuanti animo consilii darem, quaque me verterem tanta tactus verecundia, astantibus ducibus, videlicet Poznano, Cuntio, Orzio domno quoque Dominico archiepiscopo, votum vovi Sancto Martino, quod si de hostibus interioribus et exterioribus eius meritis victor exsisterem, supranominati comitatus decimationem de omnibus negociis, prediis, terris, vineis, segetibus, vectigalibus, vinumque hospitum, quod in prediis eorum excresceret, ne parrochiano episcopo pertinere videretur, sed magis abbati eiusdem monasterii, sub testimonio prefatorum ducum multorumque comitum absque ulla mora subiugarem. Dumque post cogitatum victoria potirer, quod animo revolveram, operis efficatia complere studui; necdum enim episcopatus et abbatiae preter ipsum locum in regno Ungarico site erant. Quod si, vos fideles, licuit mihi, quo volui loco, episcopatus et abbatias statuere, an non licuit cuipiam loco, quod volui, ut facerem? Et ne adhuc aecclesia Sancti Michahelis vacua esse videretur, vel episcopus parrochianus iniurias querimoniasve in collectione decimationis pateretur, ei curtem, que vocatur Cortou cum hominibus eidem pertinentibus tradidi. Quod si ipse contra mea statuta quid inique agere vel adquirere voluerit, ante Deum iudicem vivorum et mortuorum in die iudicii se contendere mecum sciat. Adhuc autem subiungens dico, sit id ipsum monasterium ab omni inquietudine semotum, habeantque monachi post transitum sui cuiusque abbatis alium abbatem securiter eligendi et a quocunque velint episcopo consecrandi eum; sitque illis licitum ordines accipere quovis loco et a quocunque episcopo. Ante neminem vero abbatum capella incedat, nisi ante patrem eiusdem monasterii propter reverentiam et sanctitatem ipsius loci, moreque episcopi in sandaliis missam celebret. Precipimus itaque sub testificatione salvatoris domini nostri Ihu Xpi , ut nullus archiepiscopus, episcopus, dux, marchio, comes, vicecomes, seu aliquis homo magnus sive parvus de iam fato monasterio aliquo modo se intromittere in mancipiis, terris, vineis, decimationibus, piscationibus, ripis, placitis sine concessione abbatis eiusdem monasterii audeat. Quod qui fecerit, componat centum libras auri optimi, medium camerae nostre, ac medium prefato monasterio suisque rectoribus, maledictionisque perpetuae vinculo eternaliter feriatur. Quod ut verius credatur hanc paginam manu propria roborantes sigillari iussimus.||
Signum domni Stefani incliti regis.||
[a király monogramja]||
Dominicus archiepiscopus vicecancerarius fecit.||
Anno dominicae incarnationis millesimo I. indictione XV. anno Stephani primi regis Ungrorum secundo hoc privilegium scriptum et traditum est. Hae sunt nominatae ville in dedicatione aecclesie ab archiepiscopo Sebastiano et a comite Ceba: piscatores Fizeg, Baluuanis, Temirdi, Chimudi, Wisetcha, Vuosian, Murin, Curtov, Wag, tertia pars tributi de Poson in omnibus rebus sive presentibus sive futuris.