Quoniam que ad tempus fiunt, labente temporis curriculo ab hominis memoria recedunt, pulcherrime usus consuetudinis inolevit ea sub litterarum privilegio memoriter retinere. Verbi gratia regnante glorioso rege A(ndrea), tertii Bele regis filio, anno ab incarnatione Domini M.CC.XI. [1211.] abbas Beati Martini Vros nomine cum comite camere tunc temporis Gatk nomine causam iniens, terram Sala cum silva, que in insula Vag continetur, ad X (decem) aratra pertinentem, iustitiam ecclesie Beati Martini fuisse iniusteque ab ea ablatam asserens requirebat. Econtra ille a rege sibi traditam et minime ad ius ecclesie predicte pertinere referebat. Abbati autem misericordiam regis pro causa prefata obnixe deprecanti utriusque causam, abbatis videlicet et comitis prenominati causam, archielectus Cholocensis Bertholdus n(omine) rege ammonente suscepit discutiendam. Discussa vero utrorum causa, uti iustitia exigebat, hominem ecclesie prefate ad candens ferrum in loco Budensi, mediante eis pristaldo Both nomine Bachiensi canonico, diiudicavit. In quem locum advenientes et omnia secundum ritum ecclesiasticum celebrantes per merita Beati Petri principis apostolorum, ut iustitia Beati Martini demonstraretur, homo ecclesie predicte ab omni penitus ferri rubigine atque combustione extitit liberrimus. Huius autem rei testes Iacobus Budensis ecclesie prepositus, Paulus cantor, Iohannes custos, decanus Moyses, Leo sacerdos, Teka sacerdos, Gervasius sacerdos et alii quamplures eiusdem loci canonici extiterunt.