Innocentius episcopus, servus servorum Dei, venerabili fratri ... episcopo Geuriensi et dilectis filiis ... abbati de Tihon et ... archidiacono de Raba Geuriensis diocesis salutem et apostolicam benedictionem. Dilectus filius ... abbas Sancti Martini de Pannonia in nostra proposuit presentia constitutus, quod cum causam, que inter monasterium suum et venerabilem fratrem nostrum ... Strigoniensem archiepiscopum super quibusdam decimationibus et rebus aliis ecclesie Sancte Marie de Sala pertinentis ad monasterium ipsum noscitur agitari, dudum venerabili fratri nostro Vesprimiensi episcopo et coniudicibus suis duxerimus committendam, idem archiepiscopus asserens prefatum episcopum esse vinculo excommunicationis astrictum, coram eo noluit respondere. Cumque reliqui sine ipso episcopo procedere non valerent, et iam dictus archiepiscopus a molestatione ipsius ecclesie non cessaret, idem abbas nostram audientiam appellavit. Ideoque discretioni vestre per apostolica scripta mandamus, quatinus partibus convocatis et auditis, que duxerint proponenda, causam ipsam, si de partium voluntate processerit, fine debito terminetis. Alioquin eandem ad nos remittatis ad concilium sufficienter instructam, ex parte nostra partibus iniungentes, ut tunc coram nobis compareant sententiam recepture. Taliter autem nostrum super hoc studeatis adimplere mandatum, quod monasterium ipsum pro defectu vestro iuris sui dispendium non incurrat. Quod si non omnes hiis exequendis potueritis interesse, tu ea frater episcope cum eorum altero nichilominus exequaris. Vos denique, frater episcope ac filii abbas super vobis ipsis et credito vobis grege taliter vigiletis, extirpando vitia et plantando virtutes, ut in novissimo districti examinis die coram tremendo iudice, qui reddet unicuique secundum opera sua, dignam possitis reddere rationem. Datum Laterani II. Nonas Maii, pontificatus nostri anni octavo decimo. [1215. máj. 6.]