Honorius episcopus, servus servorum Dei, dilectis filiis ... abbati et conventui monasterii Sancti Martini de Pannonia salutem et apostolicam benedictionem. Cum in privilegiis vobis ab apostolica sede concessis fiat mentio libertatis privilegii Casinensis ecclesie, humiliter fili abbas cum multa precum instantia postulasti, ut privilegium eiusdem Casinensis monasterii, cuius transcriptum dilecti filii ... abbas et conventus ipsius ad quorundam fratrum nostrorum preces nobis sub suis sigillis miserunt, annotari misericorditer faceremus. Nos itaque huiusmodi precibus inclinati de fratrum nostrorum consilio transcriptum ipsum de verbo ad verbum presenti pagine iussimus annotari. Cuius tenor talis est:||
Sanctissimo patri domino suo et benefactori precipuo domino Honorio, Dei gratia sancte Romane et apostolice sedis summo et universali pontifici Stephanus, licet immeritus, ecclesie Casinensis minister et eiusdem ecclesie conventus humilem commendationem cum pedum osculo. Veniens ad nos Vrias, venerabilis abbas Sancti Martini de Pannonia litteras dominorum ... Albanensis et ... Tusculani episcoporum et venerabilis cardinalis Sancti Adriani nobis attulit, ut privilegium quoddam a Zacharia papa felicis memorie, predecessore vestro, ecclesie Casinensi indultum sibi transcribi fideliter faceremus. Quorum nos precibus annuentes illud de verbo ad verbum per manus Philippi notarii nostri transcribi fecimus fideliter, quod vestre sanctitati transmittimus nostris sigillis munitum. Cuius tenor talis est:||
Zacharias episcopus, servus servorum Dei, omnibus ecclesie catholice filiis salutem et apostolicam benedictionem. Omnipotenti Deo, cuius melior est misericordia super vitas, gratias agimus ... At vero cui pio intuitu huius nostri apostolici constituti observator existit, benedictionis gratiam a misericordissimo Domino Deo nostro per intercessionem beatissimi patris nostri Benedicti consequatur et vite eterne premia adipisci mereatur.||
Hoc privilegium ego frater Philippus, domini Stephani venerabilis Casinensis abbatis notarius de mandato ipsius domini abbatis de verbo ad verbum fideliter scripsi in anno dominice incarnationis M. CC. XXV. mense Aprili, XXVIIII. die eiusdem mensis, indictione tertia decima, [1225. ápr. 29.] quod ad maiorem fidem proprie manus signo munivi atque complevi.||
Scriptum per manus Leonis notarii et regionarii atque scriniarii karissime Romane ecclesie in mense Ianuarii per indictionem suprascriptam propriam (e helyett: primam), [748. jan.] datarum duodecimo Kalendarum Martiarum [748. febr. 18.] Aquini per manum Benedicti episcopi Sancte Silve Candide ecclesie et bibliothecarii sancte sedis apostolice anno Deo propicio pontificatus domini nostri Zacharie summi pontificis et universalis pape in sacratissima sede Beati Petri apostoli primo, in mense Martio, indictione suprascripta.||
Datum Tibure, Idibus Maii, pontificatus nostri anno nono. [1225. máj. 15.] Nos Egidius domini pape subdiaconus et capellanus hoc transcriptum de originali privilegio de verbo ad verbum fideliter scriptum diligenter fecimus ascultari et ascultatum sigillo nostro roborari fecimus in testimonium et cautelam.