In nomine Sancte Trinitatis et Individue Unitatis. (A)ndreas, Dei gratia Hungarie, Dalmatie, Crohatie, Rame, Servie, Galitie Lodomerieque rex in perpetuum. Cum ad ultime voluntatis stabilitatem provida dispositio sit necessaria, et omnis dispositionis confirmatio ad regie maiestatis pertineat officium, presentibus et posteris notum esse volumus, quod accedens ad nostram presentiam fidelis noster Vros abbas Sancti Martini de Sacro Monte Pannonie, nobis intimavit, quod quedam de bonis ecclesie per ipsum acquisitis ad mensam fratrum suorum et ad sustentationem pauperum et ad luminaria monasterii tam per diem quam per noctem consensu et consilio fratrum suorum disposuisset, postulans a nobis, quod nos dispositionem per ipsum factam, regie serenitatis privilegio confirmaremus. Nos igitur iustis ac honestis petitionibus ipsius favorabilem prebentes assensum, seriem dispositionis sue privilegii nostri munimine fecimus confirmari. Cuius dispositionis series hec est:||
Ego Vros dictus abbas Sancti Martini de Sacro Monte Pannonie vicesimum annum gerens in amministratione licet indignus, tamen (elab)orans et desudans in hedificiis monasterii, officinalium, domorum, que combusta et destructa totaliter erant, rehedificandis satis proficiens, similiter et in pluribus negotiis et causis requirendis, promovendis cum consilio et auxilio ac consensu fratrum meorum plus quam omnes predecessores mei, qui fuissent a tempore Sancti Stephani regis, sicut apparet per privilegia et predia, que sunt acquisita vel empta vel recuperata tempore nostro, scilicet privilegia, que acquisivimus pro libertatibus et inmunitatibus et conservandis rerum ecclesie: privilegium domini Innocentii tertii, et confirmationem eiusdem super privilegio sancti regis Stephani et sententiam diffinitionis super decimis comitatus Symigiensis; et privilegium Honorii pape tertii et confirmationem eiusdem super privilegiis montis Cassini Sancti Benedicti, in quibus declarantur et confirmantur libertates ecclesie nostre; et privilegia, que obtinuimus ab illustrissimo rege nostro Andrea super confirmationibus et renovationibus privilegiorum, scilicet Sancti Stephani regis et Beati Ladiszlai et bone memorie Geyse et Bele regum super omnibus possessionibus ecclesie nostre et villis et prediis et molendinis, que requisita vel empta vel donata fuerunt tempore nostro. Quorum nomina hec sunt:||
In Sala villa Molua et due ville clericorum et villa Stara et villa Noua et villa de Odwory, et villa de Precha et villa de Sancta Cruce, et villa de Elbeu et villa de Sceleus et villa de Sochorou, et villa de Catl et terra de Barsunus et villa de Pethend et terra de Wynar et predia de Nema, de Asuantheu cum tribus molendinis, de Cychou et Gamas et in Hygmogos et in sillva Selyz. Hec omnia verius sunt empta quam acquisita vel donata. Preterea super decimis Symigiensibus ecclesie, quas reddere nolebant et contradicebant, et templarium et hospitalariorum et villarum suarum et Albensium canonicorum similiter in Symigiensi comitatu existentium, similiter Latinorum Albensium et etiam Byssenorum et populorum Wesprimiensis episcopi. Sed quia super hiis omnibus acquirendis retraxeram aliquos proventus, qui debebantur ad mensam fratrum meorum pro piscibus emendis ex consensu eorumdem, scilicet de predio de Knesa et de piscina Miroth de eodem loco et de Batha et de Budrug et de piscatoribus de Sala restituere curavi. Et super addere ad mensam dictorum fratrum redditus de Sala, de quinque villis, de tributis, de decimis cum omnibus appendiciis suis, similiter et de prediis Fysu et de ecclesia cum omnibus appendiciis suis. Ut de cetero nulli successorum meorum fas sit vel audacia retrahendi de hiis, que ad mensam fratrum vel sustentationem infirmorum cum consensu omnium fratrum et fidelium iobagionum et maxime ex consensu domini mei illustrissimi regis Andree ex antiquis et novis meis temporibus acquisitis stabilivi. Preterea similiter ad luminaria monasterii tam per noctem quam per diem, ad decorem domus Dei assignavi proventus temporales ecclesiarum scilicet Sancte Marie et Sancti Villibaldi et Sancti Martini de Pannonia et Sancti Martini de Keurishyg, et de Tepey et Sancti Ladislai de Selyz et omnium sanctorum de Temerd.||
Ut autem series huius dispositionis nullis umquam temporibus possit in irritum revocari, sed salva semper et inconcussa nostris nostrorumque successorum temporibus permaneat, presentem concessimus paginam dupplicis sigilli nostri munimine in perpetuum roboratam. Datum anno ab incarnatione Domini M.CC.XX.VI., regni nostri anno vicesimo tertio. [1226.]