Andreas, Dei gratia Hungarie, Dalmatie, Chroatie, Rame, Servie, Galitie Lodomerieque rex in perpetuum omnibus presens scriptum inspecturis salutem et gratiam. Cum ea, que deliberatione bonorum legitime disponuntur, posterorum commendanda notitie rata semper et inconcussa permanere debeant, ad regie maiestatis excellentiam precipue pertinet, ut que regum auctoritate seu donatione in ampliandis locis ad Dei cultum dedicatis pertractantur, standi vigorem in perpetuum sortiantur. Hac siquidem et nos animadversione moniti ad petitionem fidelium nostrorum Urie abbatis et conventus Sancti Martini anuimus, ut dilectum nostrum cancellarium Bulsu prepositum Geuriensem ad ipsorum monasterium diri geremus, qui litt(er)as venerabilis patris Ugrini Colochensis archiepiscopi super piscina Miroht eisdem indultas fideliter inspiceret et de verbo ad verbum nostre pagine annotaret et nobis fideliter renunciaret. Cui fidem adhibentes ea, que dictus archiepiscopus diffinierat, ne aliquando super hiis invida quippiam subprimere posset oblivio et de novo lites insurgerent, auctoritate litterarum nostrarum et sigilli munimine fecimus roborari. Quarum tenor talis est:||
U(grinus) divina miseratione Colochensis archiepiscopus universis Christi fidelibus salutem et sincere caritatis affectum in Domino. Delegatam a domino rege causam suscepimus cognoscendam inter abbatem Sancti Martini de Pannonia et abbatem Sancti Demetrii de Sirmia super quadam piscina sita iuxta Knesa, que vulgariter Miruht nominatur. Cum itaque ventum esset ad processum negotii, dictus abbas de Pannonia piscationem in piscina memorata violenter esse factam a iobagionibus abbatis Sancti Demetrii ad dampnum marcarum XVI (sedecim) testimonio provincialium comprobavit, asseverans firmiter per autenticium Sancti Ladizlai se debito probaturum, quod piscina memorata supra semper ad monasterium Sancti Martini pertineret, abbate tamen Sancti Demetrii suisque populis reclamantibus et dicentibus, quod eandam (!) piscinam esse sue ius ecclesie privilegio, quod haberent apud episcopum Quinqueecclesiensem et comitem Cletum, comprobarent. Statuto vero termino et diu protelato, cum sepe dictus abbas de Pannonia exemplar sui privilegii presentaret, paratus etiam autenticum presentare, altera parte nullo innitente instrumento, de misericordia, que superexaltat, iudicio distulimus venturum pascha domino abbati Sancti Demetrii approbandum suum ius et presentandum sua privilegia terminum prefigentes, piscinam tamen et eius usum usque illud tempus apud abbatem Sancti Martini sine contradictione relinquentes, hoc addito, quod dictus abbas Sancti Demetrii et eius populi dampnum marcarum XVI (sedecim) abbati Sancti Martini de Pannonia et nobis iudicium persolverent incunctanter et in pascha dato sibi termino cum suis privilegiis ad nos accederent responsuri. Que privilegia si tunc presentare non valerent, de cetero piscina sepe memorata in ius abbatis Sancti Martini de Pannonia devolveretur in perpetuum. Datum anno Verbi incarnati Mo CCo XXo VIIIo. [1228.]