In Christi nomine amen. Anno ab incarnatione Domini Mo CCo XXXIIIo, indictione V., XII. Kalendas Maii [1233. ápr. 20.] in capitulo monasterii Beati Martini de Sacro Monte Pannonie dominus Urias abbas et (conventus loci eiusdem) cum consensu omnium fratrum monachorum suorum et ipsi fratres monachi, scilicet Hemericus prior, Iohannes quondam abbas nunc prepositus prescripti monasterii Beati Martini, Nychodemus, Lazarus, Kana prepositus Symigiensis, Aymo, Seruacius, Vitalis, Thomas custos Sancti Martini, Machabeus, Mathias, Beniaminus, Felix, Iohannes, Michael, Herricus, Urbanus, Farcasius, Saulus, Ioan, Primus, Vitus, Valentinus, Georgius, Ambrosius, Elias, Symon sacerdotes, Benedictus, Beda, Saduceus, Taddeus, Symon, Ioanka diacones, Kilianus, Andreas subdiacones, Nycholaus, Bernardus et Florianus pro se et ecclesia Sancti Martini ex una parte, et Egidius monachus, Symon, Benc clerici, Ybrachim, Ambrosius, Mochcus et Albertus principales capitanei populorum et iobagionum omnium pertinentium ad ecclesiam Sancti Martini pro se personaliter et pro ipsis populis et iobagionibus supradictis ex altera compromiserunt in fratrem Enoch ordinis predicatorum et magistrum Albeum archidiaconum Huntensem et magistrum Cognoscentem canonicum Strigoniensem et capellanum domini Iacobi Prenestini electi apostolice sedis legati tunc inquisitores supradicti monasterii ex mandato domini legati predicti de omni lite vel litibus discordiis, controversiis, iniuriis, violentiis vel rixis et de omnibus causis, quas haberent vel habere possent tamquam in arbitros, compromissarios arbitratores seu amicabiles compositores promittentes ... abbas et conventus pro se et dicta ecclesia Sancti Martini et supradicti capitanei pro se et populis ac omnibus iobagionibus suprascriptis dictis arbitris et sibi ad invicem partes per stipulationem sub sententia et pena excommnnicationis tunc ab eis imposita et lata de voluntate dictorum ... abbatis et conventus et capitaneorum tali conditione, quod quicunque non impleret aut contradiceret vel obviaret vel non servaret, quicquid concorditer dicerent ipsi arbitri, preciperent semel vel pluries, quotiens vellent et quando et ubi vellent, laudarent, arbitrarentur, sententiarent vel iudicarent, presentibus partibus vel absentibus, extunc esset excommunicatus ipso iure, remota omni exceptione et data licentia, quod omnia dicerent et facerent in omnibus et per omnia ad eorum beneplacitum et voluntatem, nulla occasione vel cavillatione seu exceptione in aliquo facto vel faciendo, dicto vel dicendo in perpetuum opponenda. Ad maiorem vero rei vel negotii firmitatem nos iam predicti inquisitores, ... abbas conventus et principales iobagionum et populorum capitanei suprascripti omnia supradicta perlecta et intellecta sigillorum nostrorum munimine fecimus roborari.