T miseratione divina Simig[iensis et T Tychoni]ensis abbates et ... prior Tychoniensis universis ecclesiarum prelatis per Ungariam constitutis presentes litteras inspecturis salutem in Domino. Noverit iam dudum [vestra universitas] litteras summi pontificis recepisse sub hac forma:||
Gregorius episcopus, servus servorum Dei, dilectis filiis ... Simigiensi et ... Ticoniensi abbatibus et ... decano Ticoniensi Vesprimiensis diocesis salutem et apostolicam benedictionem. Dilecti filii ... abbas et conventus monasterii Sancti Martini de Pannonia nobis significare curarunt, quod cum olim ipsi Demetrium, Budou, Urulou, Benedictum ac alios homines de villa Vizha Vesprimiensis diocesis coram dilecto filio Egidio subdiacono et capellano nostro, tunc in Ungaria de mandato nostro morante, super cumbustione capelle Sancti Iacobi de Heremo, monasterio ipsi subiecte, ac iniectione manuum violenta in monachos et conversos eiusdem, necnon dampnis et iniuriis irrogatis eisdem traxissent in causam, idem capellanus in eos exigente ipsorum contumacia manifesta excommunicationis sententiam promulgavit et excommunicatos denunciavit ac nunciari publice fecit eosdem. Sed ipsi claves ecclesie contempnentes in eadem excommunicationis sententia iam per sex annos dampnabiliter persteterunt, nichilominus se divinis temere ingerendo in animarum suarum periculum eorum preiudicium et ecclesiastice discipline contemptum. Ut igitur vexatio eis forsan tribuat intellectum, discretioni vestre per apostolica scripta mandamus, quatinus predictam excommunicationis sententiam, sicut rationabiliter est prolata, facientes usque ad satisfactionem condignam auctoritate nostra sublato appellationis obstaculo inviolabiliter observari, eam singulis diebus dominicis et festivis pulsatis campanis et candelis accensis sollempniter publicando si de huiusmodi manuum iniectione vobis constiterit, dictos sacrilegos tamdiu appellatione remota excommunicatos publice nuntietis et faciatis ab omnibus arcius evitari, donec passis iniuriam satisfecerint competenter et cum vestrarum testimonio litterarum ad sedem venerint apostolicam absolvendi, invocato ad reprimendam eorum malitiam, si opus fuerit, auxilo brachii secularis. Quod si non omnes hiis exequendis potueritis interesse, duo vestrum ea nichilominus exequantur. Datum Perusii X. Kalendas Augusti, pontificatus nostri anno nono. [1235. júl. 21.]||
Quia vero error, cui non resistitur, approbatur et viros decet ecclesiasticos providere, ne dissolvatur nervus ecclesiastice discipline; quia rem invenimus ita esse: vestram universitatem omni affectione, qua possumus, in hac parte duximus exorandam, auctoritate domini pape vobis firmiter iniungentes, quatenus predictam excommunicationis sententiam in ipsos prolatam frmiter faciatis observari et a vobis arcius evitari, ne censura ecclesiastica videatur omnino contempni. Sciat etiam vestra universitas, quod sub eadem forma domino episcopo Vesprimiensi tamquam ordinario scripsimus, rogantes diligenter eundem et auctoritate domini pape firmiter iniungentes, ut per se et per suos subditos ipsam sententiam firmiter faceret observari et ab omnibus arcius evitarei (! evitari), donec eisdem abbati et conventui satisfacerent et cum nostrarum testimonio litterarum ad sedem accederent apostolicam absolvendi.