Gregorius episcopus, servus servorum Dei, venerabilibus fratribus ... archiepiscopo Strigoniensi (Colocensi) et suffraganeis suis et dilectis filiis abbatibus, prioribus et aliis ecclesiarum prelatis per Strigoniensem (Colocensem) provinciam constitutis salutem et apostolicam benedictionem. Dilecti filii ... abbas et conventus monasterii Sancti Martini de Pannonia sua nobis insinuatione monstrarunt, quod cum ipsis plures commissiones ad diversos iudices diversis temporibus super diversis questionibus et dampnis ac iniuriis sibi et ipsi monasterio irrogatis, nec non et rebus aliis a sede apostolica impetrantibus, iudices ipsi quandoque interdicti, nonnunquam vero suspensionis vel excommunicationis sententias exigente iustitia proferant in rebelles ac mandent locorum ordinariis, ut easdem sententias et ipsi reverenter observent et faciant a suis subditis firmiter observari: dicti ordinarii huiusmodi mandato recepto non solum predictas sententias non observant, verum etiam eosdem excommunicatos nunciatos publice ac suspensos in suo errore confovent et defendunt in eorundem abbatis et conventus preiudicium ac ecclesiastice discipline contemptum. Quia vero error, cui non resistitur, approbatur, et viros decet ecclesiasticos providere, ne dissolvatur nervus ecclesiastice disciplice (! discipline): universitati vestre per apostolica scripta firmiter precipiendo mandamus, quatinus cum a iudicibus a sede apostolica delegatis super observandis eorum sententiis fueritis de cetero requisiti, et vos ipsi eas humiliter observetis, et faciatis a subditis vestris inviolabiliter observari. Datum Perusii V. Idus Iulii, pontificatus nostri anno nono. [1235. júl. 11.]