Capitulum ecclesie Ieuriensis omnibus Christi fidelibus presentium inspectoribus salutem in salutis largitore. Fines causarum de facili in ambiguum rediguntur, nisi testimonio litterarum fulciantur. Quocirca universitati vestre tenore presentium declaramus, quod Elya abbate monasterii Beati Iacobi de Selyz, Corrado filio Petri de Cethun et Georgio filio comitis Desiderii nepote eiusdem Petri, patronis dicti monasterii de Seliz (!) ex una parte, necnon Cosma decano monasterii Beati Martini de Sacro Monte Pannonie nomine procuratorio Favi abbatis eiusdem monasterii coram nobis comparentibus ex altera, proposuerunt, quod, cum idem F(avus) abbas abbatem de Selyz et prenotatos nobiles coram domino rege traxisset in causam, volens ab ipso abbate in villa Tuneu repetere silvam in terre duorum aratrorum iacentem et terram arabilem usui unius aratri sufficientem, a dictis autem nobilibus in eadem villa centum viginti iugera terre similiter repetere voluisset, quasi iidem abbas et nobiles violenter occupatas detinuerint, tandem ex permissione domini regis ipse partes compromisissent in arbitros, obligando se eorumdem sententiam irrecusabiliter tolerare. Igitur per sententiam dictorum arbitrorum taliter extitit ordinatum, quod dictus abbas de Selyz monasterio Beati Martini statuit quandam silvam inter villam Tunev et Apaty super uno monticulo a parte occidentali existentem, cuius meta in via annexa radici eiusdem montis incipiendo ascendit usque ad metas nobilium de Scemere, ubi de novo meta est erecta separans ipsam silvam et terras dictorum nobilium de Scemere ab invicem; capitenea autem meta incipit in quadam via herbosa seu pedestri semita et protenditur versus aquilonem usque ad metas vinearum comitis Desiderii et ibi terminatur. Item eidem monasterio Beati Martini superaddendo statuit quadraginta iugera terre mixtum iacentia cum terris prenominatorum nobilium et ipsius monasterii de Seliz. Corradus vero et Georgius supradicti statuerunt eidem Favo abbati etiam quadraginta iugera similiter mixtim iacentia. Et hiis omnibus idem F(avus) abbas ad se receptis plenarie contentus, tam ipsum dominum abbatem de Seliz, quam predictos nobiles renuntiando liti et disceptationi absolvit ab omni actione et impetitione, quam ratione suprascripta moverat contra ipsos, prout partes supradicte, insuper etiam magister Saulus, archidiaconus Supruniensis, et magister Marcus, concanonici nostri, in quorum presentia et arbitrio processus seu compositio exstitit ordinata et decisa, nobis recitarunt viva voce. Ipsos etiam nobiles, utpote ab ipso penitus expeditos idem F(avus) abbas iuris et possessionis hereditarie reliquit pacificos possessores. Nec hoc pretermittimus, quod idem Elyas abbas et nobiles sepedicti protestati sunt, monasterium Sancti Martini habere et semper habuisse centum triginta et tria iugera item in eadem villa Tunev, exceptis supradictis terris, quas ipsi statuerunt. Ut igitur huius rei series robur perpetue firmitatis optineat, presentes litteras concessimus quartam partem earundem in nostra camera reservando. Anno Domini millesimo ducentesimo quinquagesimo octavo, [1258.] Chepano ecclesie nostre preposito, Iurkono cantore, Thoma custode existentibus.||
A B C D