Capitulum ecclesie Hantensis omnibus presens scriptum inspecturis salutem in Domino sempiternam. Ad universorum notitiam tenore presentium volumus pervenire, quod commes (!) Corrardus, filius Kulchey de Guug, in nostri personaliter presentia constitutus confessus est viva voce, quod terram suam et domos suas sitas in terra Guug, exemptas et separatas a generatione sua pacifice ab antiquo ex permissione domine uxoris sue, que ordinem et abitum (!) abbatissarum ecclesie Beati Virginis de Vesprimio assumpsit et elegit, ecclesie Sancti Martini [de] Sacro Monte Pannonie contulisset iure hereditario in perpetuum possidendas, in qua idem comes Corrardus divino nutu ammonitus et instructus monakalem habitum se professus est assumpsisse. Requisitus etiam ipse idem Corrardus per nos presente fratre Gregorio, tunc tempore magistro curie inferioris ecclesie Sancti Martini supradicte, utrum per fratres suos et generationem suam contradictio seu signum impeditionis ratione terre et domorum fuerit inposita vel illata, dixit, quod in nullo ab aliquo fuerit inpeditus. Ne igitur per quempiam ipsius donatio et dispositio salutaris processu temporum possit irritari et malitiosa persecutione defraudari, ad instantiam et petitionem condignam iam dicti comitis Corrardi presentes concessimus litteras sigilli nostri munimine roboratas. Datum anno Domini M° CC° sexagesimo septimo, Symone preposito, Azaria cantore, Hanta custode, Isiph decano existentibus. [1267.]||
A B C D