Stephanus, Dei gratia Hungarie, Dalmatie, Croatie, Rame, Servie, Gallicie, Lodomerie, Cumanie, Bulgarieque rex, omnibus, tam presentibus, quam futuris, presentem paginam inspecturis salutem in salutis largitore. Ad universorum notitiam harum serie volumus pervenire, quod, cum propter devotionis nostre fervorem monasterium Beati Martini de Sacro Monte Pannonie divertissemus visitare, venerabilis vir Bonifacius, abbas monasterii eiusdem, inter cetera ipsius monasterii privilegia exhibuit nobis privilegium domine Bele, illustris regis Hungarie, felicissime recordationis, karissimi patris nostri, datum super libertate conditionariorum ipsius monasterii, quantum ad collectarum solutionem, continens hunc tenorem:||
Bela, Dei gratia Hungarie, Dalmatie, Crovatie, Rame, Servie, Gallicie, Lodomerie, Cumanieque rex, omnibus tam presentibus quam futuris, presentes litteras inspecturis salutem in omnium salvatore. Regalis pietatis providentia universis universaliter et singulis singulariter, non solum maioribus, verum etiam et minimis abesse non debet in suis iuribus, sed adesse ita, quod unicuique reddens, quod suum est, bone rei dans consultum et temporalem remunerationem et eternorum reportet augmentum merito premiorum. Hinc est, quod ad universorum, tam presentium, quam futurorum notitiam harum serie volumus pervenire, quod populos conditionarios ecclesie Beati Martini de Sacro Monte Pannonie in regno nostro ubicunque existentes per diversarum talliarum et collectarum exactores et collectores contra suam consuetam libertatem multipliciter aggravatos voluimus et volumus relevare ita, quod quascunque tallias, exactiones et collectas per regnum nostrum, sicut consuevimus, faciemus, ipsi nonnisi dimidiam collectam solvere teneantur, sive fuerint in denariis, sive in victualibus, sive in aliis, dummodo sint collecte, non referat, quocunque nomine censeantur. In cuius rei memoriam, firmitatemque perpetuam presentes concessimus litteras duplicis sigilli nostri munimine roboratas. Datum per manus magistri Demetrii, Albensis prepositi, aule nostre vicecancellarii, dilecti et fidelis nostri, anno Domini M° CC° LX° nono, tertio Kalendas Novembris, regni autem nostri anno XXX° quarto. [1269. okt. 30.]||
Nos itaque ex officio susscepti regiminis nostri unicuique, quod suum est, reddere cupientes, quamquam universis debeamus manus regalis munificentie aperire, ecclesias tamen Dei et populos illis subiectos in suis volentes antiquis libertatibus indempniter conservare, predecessorum nostrorum vestigiis inherendo, iam dictum privilegium presenti pagina, de verbo ad verbum inseri facientes, ratum habentes confirmamus, volentes et solempni edicto statuentes, ut conditionarii eiusdem ecclesie Beati Martini in regno nostro ubicumque existentes ad omnes collectas, tallias et exacciones, quas per regnum nostrum, sicut consuevimus, facere nos contingat, sive fuerint in denariis, sive in victualibus, sive in aliis, dummodo sint collecte, dimidiam collectam solvere teneantur, ne iidem conditionarii per collectores occasione aliquarum collectarum ad amplius cogi valeant vel compelli. In cuius rei memoriam, firmitatemque perpetuam presentes concessimus litteras duplicis sigilli nostri munimine roboratas. Datum per manus magistri Benedicti, Orodiensis ecclesie prepositi, aule nostre vicecancellarii, dilecti et fidelis nostri, anno Domini M°CC° septuagesimo, sexto Idus Novembris, regni autem anno primo. [1270. nov. 8.]