A B C||
Capitulum Iauriensis ecclesie universis Christi fidelibus presentem paginam inspecturis salutem in Domino sempiternam. Ad universitatis vestre notitiam tenore presentium volumus pervenire, quod nobilis domina Elisabeth, filia Ihoannis (!) de Zegh, de genere Hunthpaznan, relicta videlicet comitis Pangracii de Eurkyn, filiorum orbata solatio et tuitione ac defensione carens proximorum, coram nobis constituta personaliter, quia propter evidentem regni perturbationem se intolerabile honus (!) dicebat suffere paupertatis, nec comode poterat sustentari se patrocinio monasterii Beati Martini de Sacro Monte Pannonie ex fervore devotionis et devote humilitatis affectu commisit et possessiones suas universas, videlicet in Eurkyn in terris arabilibus et in Ech in vineis, quas post mortem dicti comitis Pangracii et Iohannis filii sui ratione dotis sue ad se dicebat devenisse, dedit et donavit predicto monasterio perpetuo possidendas eo scilicet modo, quod quamdiu eadem domina vixerit, abbas monasterii sepedicti in alimentis et vestibus decentibus ipsam tenebitur sustentare; articulo huiusmodi etiam interposito et apposito, quod quicunque cognatorum, affinium vel proximorum dicti comitis Pangracii ipsas possessiones a dicto monasterio voluerit revocare, pro quinquaginta marcis, que ad rationem dotis sepedicte domine debeant pervenire, easdem abbas dicti monasterii reddere teneatur et pecuniam recipere pro sustentatione domine sepedicte. In cuius rei memoriam presentes concessimus litteras nostro sigillo roboratas. Datum in octavis Pentecostes, anno Domini M° CC° octogesimo sexto, [1286. jún. 9.] magistro Charachino ecclesie nostre preposito, Dominico cantore, Borsone lectore, Stephano custode existentibus.