(B)olezlaus, Dei et apostolica gratia archiepiscopus Strigoniensis, eiusdemque loci comes perpetuus et dux Thostensis, universis Christi fidelibus presentium notitiam habituris salutem in omnium salvatore. Ad universorum notitiam, tam presentium, quam futurorum harum serie cupimus pervenire, quod accedens ad nostram presentiam honorabilis vir Iacobus, olim iudex Posoniensis, filius quondam comitis Deprehti civis Posoniensis, exhibuit nobis quasdam litteras privilegiales magistri Altegradi de Lendanaria doctoris decretorum, domini pape capellani et tunc apostolice sedis legati cancellarii et generalis auditoris causarum, tenoris infrascripti petens ad maioris iuris conservationem earundem litterarum ipsas (!) nostris dignaremur litteris aprobare. Quarum quidem litterarum tenor talis est:||
(In) nomine Domini Amen. Noverint universi presentes litteras inspecturi, quod orta dudum inter religiosum virum fratrem Hermanum abbatem et conventum monasterii Sancti Martini de Sacro Monte Pennonie (!)Iauriensis diocesis, ex parte una et discretum virum dominum Seraphinum prepositum ecclesie Posoniensis, Strigoniensis diocesis, ex altera super quadam capella constructa per eosdem abbatem et conventum in villa Deanus in preiudicium parrochialis ecclesie Sancti Martini de villa Miser ad prefatum prepositum inmediate spectantis et contra denunctiationem novi operis factam per eundem prepositum materia questionis, tandem cum coram nobis, magistro Altegrado de Lendenaria, doctore decretorum, domini pape capellano ac venerandi patris et domini domini Nicolai, Dei gratia Ostiensis et Velletrensis episcopi, apostolice sedis legati cancellario et generali auditore causarum aliquamdiu per partes easdem litigatum fuisset, ad talem, mediantibus venerabilibus patribus ... Quinqueecclesiensi et ... Varadiensi episcopis et magistro Paulo preposito Colocensi, pro bono pacis concordiam in nostra constituti presentia devenerunt, videlicet quod omnia iura spiritualia in predicta capella in eadem villa Deanus constructa ad archiepiscopum Strigoniensem et prepositum Posoniensem, qui erunt pro tempore, secundum antiquum morem pertineant, iure autem funerandi et baptisandi predicte capelle dumtaxat integraliter remanente, quod solus sacerdos predicte ecclesie Sancti Martini debeat exercere, ipseque sit sacerdos utriusque ac oblationes et obventiones percipere valeat ad ipsas ecclesias pertinentes. Adiecerunt insuper in compositione predicta, quod, si contigerit predictum abbatem Sancti Martini pro tempore ad dictam capellam accedere, capellanus vel monachus ipsius abbatis pro eiusdem abbatis persona possit in predicta capella de Deanus libere celebrare, set (!) in omnibus aliis spiritualibus iuribus nullatenus se intromittat. In cuius rei testimonium presentes litteras per Iohannem infrascriptum notarium scribi et in hanc publicam formam redigi mandavimus et sigilli nostri appensione muniri. Datum et actum Posonii de XXIIII° Ianuarii, pontificatus domini Bonifacii pape VIII. anno octavo, sub anno Domini Mo CCC° secundo, indictione XVa [1302. jan. 24.]||
Nos itaque iustis et legitimis eiusdem Iacobi petitionibus favore paterno inclinato tenorem prescriptarum litterarum de verbo ad verbum presentibus insertum ratificamus et ipsam compositionem auctoritate metropolitano presentium patrocinio perpetuo confirmamus cassantes et irritas nunctiantes quascumque nostras vel predecessorum nostrorum litteras contra huiusmodi compositionis seriem quibuscunque concessas et quomodolibet emanatas. In cuius rei memoriam et certitudinem pleniorem presentes concessimus sigilli nostri autentici munimine roboratas. Datum Posonii in dominica Letare, anno Domini M° CCC° XX° quarto. [1324. márc. 25.]