Nos frater Odo, miseratione divina abbas de Cyrch, ordinis Cysterciensis, per sanctissimum patrem dominum Iohannem papam XXII-m iudex ad infrascripta delegatus, tenore presentium universis cupimus fore notum, quod cum secundum continenciam litterarum religiosi viri fratris Stephani abbatis predecessoris nostri sententiam excommunicationis auctoritate predicti domini nostri summi pontificis in se continentium Povsa plebanus de Segust pro primo, secundo et tertio terminis parcendo laboribus et etiam expensis partium, citatus super facto decimarum eiusdem ville Segust coram nobis prout a sede apostolica delegato iudice sententiam diffinitivam partium instrumentis visis expectarus (!) in quindenis Beati Iohannis Baptiste [1332. júl. 8.] contra venerabilem patrem dominum Nicolaum abbatem monasterii Sancti Martini de Sacro Monte Pannonie, ut actorem, comparere debuisset, ipso termino adveniente pro dicto domino Nicolao abbate frater Iohannes prior eiusdem monasterii Sancti Martini cum sufficienti procuratorio comparuit coram nobis, suaque instrumenta videlicet excellentissimi principis domini Stephani Sanctissimi quondam regis Hungarie litterasque papales confirmationem ipsarum decimarum et donationem ville Segust in se continentes nobis simul cum domino Iacobo abbate de Bel ac domino Iohanne abbate de Iast necnon ... custode capituli Vesprimiensis pro tribunali sedentibus exhibuit, ut debebat, predictus vero Pousa plebanus eiusdem ville Segust nec venit, nec aliquem pro se misit responsalem per partem adversam in legitimo termino assignato sufficienter expectatus et quia nostri intererat ipsam causam sententia diffinitiva in ipsis quindenis Nativitatis Beati Iohannis Baptiste finaliter terminare ipsam decimam ville Segust visis certis et edificacibus (!) instrumentis simul cum suis pertinentiis universis dicto domino abbati et per ipsum suo monasterio adiudicando decrevimus perpetuo et irrevocabile (!) pertinere, sepedictum autem Pousam plebanum de Segust propter contemptum sedis apostolice in eo, quia in termino peremtorie sibi prefixo contumaciter nostri in presentia comparere non curavit sententiam excommunicacionis in ipsum proferimus in his scriptis. Quare vobis plebanis et ecclesiarum rectoribus videlicet onmium circumsedentium vicinis ecclesie de Segust ex precepto apostolico nobis commisso damus in mandatis et auctoritate apostolica, qua fungimur in hac parte, sub virtute obedientie firmiter imponimus et districte, quatinus dominum Nicolaum abbatem Sacri Montis Pannonie in corporalem possessionem predicte decime de Segust et ipsarum pertinentiarum auctoritate papali per nos in hac parte vobis concessa et commissa restituatis et perpetuo confirmetis, sepedictum vcro Pousam plebanum de Segust in toto comitatu Symigiensi publice excommunicatum denuncietis et ab omnibus ecclesiarum rectoribus eiusdem comitatus Symigiensis denunciari singulis diebus dominicis et festivis excommunicatum pulsatis campanis et extinctis luminibus sollempniter faciatis et a Christi fidelibus precipiatis artius evitari, donec de perceptis domino Nicolao abbati prefato Sacri montis Pannonie per eundem Pousa plebanum satisfactio inpendatur. Lata et facta est hec nostra sentencia diffinitiva in monasterio nostro de Cyrch presentibus abbatibus et plebanis et aliis quampluribus ad hoc per nos specialiter invitatis. In cuius rei testimonium et robur presentes litteras nostras sigilli nostri et assessorum nostrorum munimine concessimus roboratas. Datum et actum in monasterio de Cyrch septimo ydus Iulii, anno dominice incarnacionis M° CCC° XXX° secundo. [1332. júl. 9.]