Nos conventus monasterii Sancti Egidii de Symigio memorie comuendamus, quod Nicolaus dictus Haragus et Ioseph, filii Salamonis, de Oltopei, item Dominicus, filius ipsius Nicolai, ab una parte, comes Petrus dictus Boldas, officialis domini Wyllermi, abbatis Sacri Montis Pannonie, in persona eiusdem domini sui ex altera coram nobis personaliter constituti, predicti Nicolaus, Ioseph et Dominicus asseruerunt viva voce, quod ipsi a progenitoribus ipsorum essent et fuissent nobiles iobagiones exercituare debentes eiusdem ecclesie Sancti Martini et ipsa possessio Oltepei, in qua nunc residentiam habent, per eandem ecclesiam Sancti Martini eis fuisset aplicata; nunc vero se cum eadem possessione eorum conditione prehabita fideliter servituros aplicassent et aplicaverunt coram nobis, obligantes se insuper, ut, si propter contumaciam successu temporum contra predictam ecclesiam Sancti Martini vel abbatem in eadem residentem insurgerent, ex tunc in succunbitu (!) duelli convincerentur eo facto; preterea idem comes Petrus eundem dominum suum obligavit, ut sepedictos Nicolaum, Ioseph et Dominicum ac eorum posteros in numero et cetu nobilium iobagionum exercituantium eiusdem ecclesie in eorum iuribus seu possessionibus pacifice conservaret et quiete; nichilhominus (!) si iidem Nicolaus, Ioseph et Dominicus in aliquam infidelitatis notam contra ipsam ecclesiam et abbatem eiusdem inciderent, ex tunc eadem possessio Oltepei in ius et proprietatem dicte ecclesie rediret iterato. Datum feria quarta proxima post octavas Beati Michaelis archangeli, anno Domini M° CCC° XXX° septimo. [1337. okt. 8.]