Nos comes [Paulus], iudex curie illustris et magnifici principis domini Karoli, Dei gratia [incliti] regis Hungarie memorie conmendamus tenore pre[sentium significantes quibus] expedit universis, [quod, cum] cives [et hospites Albensis civitat]is religiosum virum fratrem Vyllermum abbatem monasterii Sancti Martini de Sacro Monte Pannonie legitime citationis modum observando ad regiam presentiam in causam attraxissent et ipsa causa diversis prorogationum cautelis intervenientibus ad octavas festi Beati Georgii martiris proxime [pret]eritas attinxisset, tandem ipsis octavis advenientibus Thomas dictus Cardas pro dictis civibus et hospitibus Albensibus cum procuratoriis litteris Cruciferorum de eadem Alba iuxta continentiam prio[rum litterarum] nostrarum coram nobis conparendo [contra eundem dominum abbatem] in figura nostri iudicii proposuit eo modo, quod idem dominus abbas a quarta revolutione annuali festi Beati Michaelis archangeli incipiens usque modo [super prediis eorundem comitatus Simigiensis decimas suas] ultra quam [predecessores] exigi fecisset, nuncque ipsas decimas potentes homines ex sua locatione exegissent super ipsos, in quibus iidem cives et hospites ab ipsa quarta revolutione [annuali in] ipsorum [prediis] quingentarum marcarum dampna perpessi extitissent et ob hoc ipsa instrumenta, quibus mediantibus eedem decime predicto domino abbati pertinere agnoscerentur, ab eo postularent exhiberi in presenti. Quibus perceptis idem dominus abbas personaliter consurgendo respondit e converso, quod ipse iustas decimas super prediis eorum exegisset et nec ipsi cives et hospites per indebitam exactionem decimarum suarum quingentarum marcarum damna habuissent; in quo damno ipse innocens esset penitus et immunis; et ibidem quoddam privilegium gloriosissimi principis domini Andree, quondam incliti regis Hungarie clare recordationis, anno Domini millesimo ducentesimo vicesimo primo [1221.] confectas nobis demonstrarat, in cuius tenore inter cetera reperimus contineri, quod idem dominus Andreas rex confirmasset sententiam diffinitivam N(icolai) palatini sui, filii Borz, quam fecit contra Bissenos de Nogholom et Hospitalares Albenses ita quidem, ut, cum ceteri Bisseni de patrimonialibus suis decimas dare non repudient, ymo conmuniter solvere conpellantur, sigillaresque pecunias de vinis suis [ubicunque in comitatu] Simigiensi occupatis, acquisitis vel vinis emptitie congregatis dare teneantur et hoc idem de Latinis Albensibus dicebat, ut ipsi de omnibus vinis suis, [tam propriis, quam empticiis] iustas decimas persolvant vel usque ad festum Sancti Martini ab emptione vini desistant, ut interim decimatores decimas de vino provenientes plene possint percipere vel, si quis emerit, non nisi consensu abbatis et recepto eius sigillo emere vel empta vina ad sua propria ante dictum festum extrahere presumat; quod si quis ausu temerario aliter facere attemptaverit et in hoc culpabilis repertus fuerit, tamquam furem condempnandum iudicasset. Unde, quia decime in quibusdam comitatibus presente homine comitis parrochyalis exigi consueverunt, ideo, cum ipsum Thomam dictum Cardas de eo, utrum litteris comitis parrochyalis vel aliis inquisitionalibus premissa dampna per ipsum dominum abbatem illata fuerint, possit conprobare vel ne, quesivissemus, idem Thomas procurator dictorum civium et hospitum premissa dampna nullis litteris declarabat, sed nec declarare assumebat contra dominum abbatem memoratum. Unde nos decreveramus, quod idem dominus abbas sola sua persona in choro monasterii Sancti Andree de Wyssegrad presente Blasio, homine nostro et in presentia comitis capelle regie feria sexta proxima ante festum Ascensionis Domini nunc preterita [1338. máj. 15.] in eo, ut ipse in facto premissi dampni quingentarum marcarum innocens sit penitus et immunis sacramentum ad suum statum deponere teneretur, seriem autem ipsius iuramenti partes secundo die ipsius iuramentalis depositionis [1338. máj. 16.] in litteris dicti comitis capelle regie nostram iudiciarium in presentiam deberent reportare. Demum ipso termino reportationis seriei adveniente idem dominus abbas ad nostram personaliter accedens presentiam litteras iam dicti comitis capelle regie nobis presentavit, in quibus ipsum iuramentum per eundem dominum abbatem rite et legitime conperimus depositum extitisse. Verum, quia idem dominus abbas ipsum iuramentum suum super premissis iuxta nostram iudiciariam deliberationem loco, tempore, modo et forma, quibus debebat, ex serie litterarum dicti comitis capelle regie rite et legitime deposuisse reperiebatur, ideo eundem dominum abbatem ratione premissorum una cum baronibus et nobilibus regni decrevimus et conmittimus fore expeditum et per omnia deliberatum iure requirente; predictas autem decimas suas iuxta formam privilegii dicti quondam Andree regis, ut premittitur, ecclesie sue confirmatas ipse dominus abbas et sui successores exigendi et possidendi habeant facultatem. In cuius rei memoriam firmitatemque perpetuam presentes litteras nostras privilegiales concessimus pendentis sigilli nostri et autentici munimine roboratas. [Datum in Wisse]grad, octavo die reportationis seriei prenotate, anno Domini millesimo trecentesimo trigesimo octavo. [1338. máj. 25.]