Excellentissimo principi domino Lodovico, Dei gratia inclito regi Hungarie, domino eorum conventus monasterii Sancti Martini de Sacro Monte Pannonie orationes in Domino humiles et devotas. Noverit vestra celsitudo, quod nos litteris vestre maiestatis inter cetera inquisitoriis pro religiose viro domino fratre Nicolao, abbate de Beel, per anni circulum generalibus receptis reverentia condecenti, iuxta seriem et continentiam earumdem una cum Andrea, filio Barnabe de Zenthyuan, homine vestro, nostrum hominem, fratrem Hildebrandum cantorem, conmonachum nostrum, ad infrascriptam inquisitionem peragendam destinavimus pro testimonio fidedignum. Qui tandem ad nos reversi nobis concorditer retulerunt, quod ipsi sabbato proximo post festum Beati Petri et Pauli apostolorum proxime nunc preteritum [1348. júl. 5.] in comitatu Vesprimiensi a nobilibus et ignobilibus, specialiter autem a vicinis et conmetaneis possessionis predicti domini abbatis et sui monasterii de Beel Haraszti vocate ac ab aliis cuiusvis status et conditionis hominibus, a quibus decuisset inquiri, diligenter et conscientiose sciscitando, hanc conperissent omnimodam veritatem, quod iobagiones magistri Chenyk de villula Seulch nuncupata de mandato eiusdem magistri Chenyk, domini ipsorum, proximis hiis diebus preteritis tres metas memorate possessionis Harazti (!) a parte ipsius villule seu possessionis Seulch perarassent et destruxissent in prescripti domini abbatis et sue ecclesie non modicum derogamen, prout etiam ipsas tres metas peraratas et destructas fore fide oculata ipsi vester et noster homines conspexissent. Datum tertio die ipsius inquisitionis, anno Domini millesimo trecentesimo quadragesimo octavo. [1348. júl. 7.]||
[Hátulján]: Domino regi pro religioso viro domino fratre Nicolao abbate de Beel contra magistrum Chenyk de Ugod et iobagiones suos de Seulch super destructione trium metarum inquisitorie.