Nos conventus monasterii Sancti Benedicti de iuxta Gron memorie conmendamus, quod religioso viro domino fratre Stephano, abbate monasterii Seraphini alias Leker vocati, in honorem Sancti Salvatoris, personaliter ab una, parte vero ex altera fratre Hildebrando cantore cenobii Sancti Martini de Sacro Monte Pannonie, pro venerabili et religioso viro domino Wilhelmo abbate cum procuratoriis litteris eorundem et mandato sufficienti ad infrascripta nostri in presentia constitutis, prefatus dominus Stephanus abbas confessus extitit viva voce, quod, quia quedam terra et pratum cum omnibus utilitatibus et pertinentiis suis domino Wilhelmo abbati et suo conventui prenotatis, quibus et eorum iobagionibus de villa Chanak eadem terra et pratum propinquiora et viciniora consisterent ad utendum, quique ipsa multis retroactis temporibus citra conservassent, adhuc ac ex nunc et deinceps conservanda commisisset et habenda et commisit ac tradidit coram nobis eo modo, quod pro usu et conservatione eorundem terre et prati, pertinentiarumque suarum iidem dominus abbas et conventus Sancti Martini et eorum successores eidem abbati de Leker et per eum suis successoribus et ecclesie singulis annis in festo Beati Georgii martiris singulas tres pensas denariorum monete pro tempore currentis coram nobis amministrare seu solvi facere teneantur sub pena dupli, si quando solvere non curarent, prout eosdem dominum abbatem, suumque conventum predictus procurator eorum auctoritate procuratoria obligavit. Datum in festo Beati Mathei apostoli, anno Domini M° CCC° L°. [1350. febr. 25.]