Nos capitulum ecclesie Iauriensis memorie conmendantes significamus presentium per tenorem, quibus expedit, universis, quod religiosus vir dominus frater Petrus, celerarius monasterii Sancti Martini de Sacro Monte Pannonie, in personis venerabilis in Christo patris domini Siffridi abbatis et tocius conventus eiusdem monasterii cum sufficienti mandato et procuratorio ad nostram veniendo presentiam per modum protestationis et prohibitionis nobis significare curavit, quod nuper Simon, filius Mauritii, existens comes Iauriensis et Bakoniensis, magnam particulam terre, existentem inter veras metas possessionis dicti monasterii Vassyan vocate, ad castrum Cheztnek vocatum occupando applicasset et ad eandem terram in grande preiudicium et dampnum prefati monasterii populos congregasset, constituens ibidem villam, quam Chykator fecisset appellari, dando eidem et secundum nomen, quod Dombotelek appellatur et sic ipsum monasterium ab hominibus in dicta terra locatis et ad dictum castrum applicatis continuas iniurias fuisset passum et pateret de presenti. Unde facta hac protestatione ydem frater Petrus celerarius nominibus, quibus supra dictum magistrum Simonem filium Mauritii ab occupatione dicte terre inter metas possessionis ipsius monasterii Vossyan vocate existentis et ad dictum castrum applicatione et ville ibidem locatione prohibuit contradicendo et contradixit inhibendo publice et manifeste coram nobis testimonio presentium mediante. In cuius protestationis et prohibitionis testimonium presentes concessimus lege regni requirente. Datum in festo apostolorum Petri et Pauli Beatorum, anno Domini M° CCC° quinquagesimo sexto. [1356. jún. 29.]