Nos Guillelmus, miseratione divina episcopus Tusculanus, cardinalis, sacri colegii reverendorum patrum dominorum sancte Romane ecclesie cardinalium camerarius, tenore presentium notum facimus univerisis, quod intellecta mole gravaminum pro parte venerabilis et religiosi viri domini fratris Sieffredi, abbatis monasterii Sancti Martini Sacri Montis Pannonie, ordinis Sancti Benedicti, Iauriensis diocesis, coram nobis exposita, que ipsum ad solvendum complementum sui communis servitii et servitiorum famulorum et officialium domini nostre pape et dominorum cardinalium predictorum, ad que solvenda dudum sub certis penis et summis ac termino nondum elapso se sponte et libere obligavit, reddebant et adhuc reddunt veri similiter impotentem, auctoritate nobis in hac parte commissa usque ad festum Assumptionis Beate Marie proxime venturum terminum sibi duximus prorogandum ita tamen, quod, si in dicto sibi prorogato termino non satisfecerit de premissis, penis et summis, quibus antea tenebatur, sit astrictus. Datum Avinione, die ultima mensis Octobris, anno a Nativitate Domini M° CCC° L° sexto, indictione XV., pontificatus domini Innocentii pape VI. anno quarto. [1356. okt. 31.]