Omnibus Christi fidelibus, tam presentibus, quam futuris, presens scriptum inspecturis Siffridus, Dei et apostolice sedis gratia abbas monasterii Sancti Martini de Sacro Monte Pannonie et conventus eiusdem loci salutem in Domino sempiternam. Solers hominum adinvenit prudentia, ut ea, que geruntur inter mortales in tempore, ne lapsu temporis a memoria elabantur, efficacis scripture patrocinio perempnentur. Proinde ad universorum, quorum interest vel in futurum intererit notitiam harum serie volumus pervenire, quod, licet actenus inter nos [ex una] et magistrum Benedictum Feys dictum, filium Dominici, item Petrum, Stephanum et Konya, fllios Iohannis filii Petri et discretum virum magistrum Iohannem, [filium] Alexandri, canonicum ecclesie Iauriensis, Iacobum fratrem eiusdem et Nicolaum filium Iohannis, nobiles de Mendzenth, necnon Laurentium filium [Iohann]is et Iohannem, filium Cosme, nobiles de Nema parte ex altera, super facto tributi seu iuris montani, quod iidem nobiles de vineis ipsorum et iobagionum eorundem in territoriis monasterii nostri existentibus more aliorum conprovincialium nobis dare et solvere recusabant, orta seu mota fuerit, per ipsos nobiles diutius in presentia magnifici viri domini Nicolai Konth, regni Hungarie palatini, ventilata materia questionis, considerato tandem, quod discordia odium, concordia generat et nutrit amorem, ut de medio nostrum scilicet et eorum omnis litis conditione sublata pacis perpetue favore ad invicem amodo gratulari queamus, conponentibus et ordinantibus probis et nobilibus viris, zelatoribus pacis, in talem concordie unionem perpetuo dur[atur]am devenimus cum eisdem, quod prenominati nobiles de Mendzenth et de Nema ac eorum iobagiones amodo et deinceps annis singulis in a[utumpno] sive tempore vindemie de singulis tunellis vini eorum in territoriis predicti monasterii nostri ubilibet procreati et germinati singulos vigi[nti octo] denarios, quorum scilicet denariorum ad minus nonaginta vel ad maius nonaginta duo in unius floreni aurei valorem conputari possint et [de]beant ac iustas decimas in locis, ubi decime nobis et dicto monasterio nostro spectant et provenire solent, ubi vero aliis ecclesiis decime ipse per[ti]nent, eosdem viginti octo denarios tantum nobis ac nostro monasterio sepedicto dare et aministrare sine omni contradictione et inpedimento quolibet teneantur, quemadmodum et canonici de honorabili capitulo et cives Iaurienses de eorum vineis in eisdem nostris territoriis existentibus solvere consueverunt hoc modo, quod nec castellani aut officiales seu alii servitores nostri, quicunque pro tempore constituti, ultra premissa prefatos nobiles et eorum iobagiones ullo unquam tempore molestare valeant aut quomodolibet impedire, vel ab ipsis aut ipsorum quolibet recipere seu petere exactionem pecunie aut munerum aliqualem. Ut igitur dicte nostre concordie et ordinationis series stabilis inter nos et nobiles antedictos et perpetua ac irrefragabilis perseveret, litteras seu instrumenta nostra super facto tributi seu iuris montani prelibati usque modo qualitercunque confecta, per que in futurum posset presenti nostre concordie quomodolibet derogari, in quantum ipsa ad eiusdem concordie violationem facere posse videntur contra presentes, cassamus et annullamus ita, quod ubicunque vel quandocunque fuerint exhibita contra presentes, nullius penitus sint vigoris. In cuius rei memoriam ac perpetuam stabilitatem presentes litteras nostras privilegiales ad petitiones predictorum nobilium fecimus emanari pendentis sigilli nostri munimine roboratas. Datum feria secunda proxima post festum Sancti Iacobi apostoli, anno Domini M° CCC° quinquagesimo octavo, [1358. júl. 30.] presentibus viris religiosis fratre Petro priore, fratre Paulo preposito, fratre Petro celerario, fratre Iohanne custode et fratre Iacobo cantore, ceterisque quam plurimis dominis et fratribus ecclesie nostre existentibus et Deo devote famulantibus.