Nos capitulum ecclesie Iauriensis memorie conmendantes significamus tenore presentium, quorum interest, universis, quod frater Paulus monachus et sacerdos monasterii Sancti Martini de Sacro Monte Pannonie, ad romanam ecclesiam nullo medio pertinentis, ordinis Sancti Benedicti, Iauriensis diocesis, in nostri presentia personaliter constitutus vice et nomine venerabilis et religiosi viri domini Ladizlai, abbatis monasterii Sancti Salvatoris de Saxardia, ad abbatiam dicti monasterii per obitum bone memorie domini Siffridi abbatis sui nuper defuncti vacantem electi protestando proposuit in hunc modum, quod licet idem dominus electus per conventum prefati monasterii Sancti Martini, ne videlicet bona et iura temporalia eiusdem monasterii per adversarios vicinos et potentes, qui plerumque ecclesiis presertim vocationis tempore sunt infesti, invadi seu turbari contingeret vel etiam dissipari, ad ipsum monasterium venerit et inibi per aliquot dies hactenus fecerit, vocatus suppliciter et rogatus, pro conservatione et tuitione uberiori bonorum et iurium predictorum, non tamen per hoc tamquam abbas ipsius monasterii de amministratione eiusdem quoad temporalia ullatenus se intromisisset, nec intromittere intenderet, donec dicta electio de se facta a sede apostolica fuerit confirmata. In cuius sue protestationis evidentiam et cautelam presentes litteras ad instantem petitionem supradicti fratris Pauli eidem duximus suadente iustitia concedendas sigilli nostri appensione munitas. Datum quinto die mensis Maii, anno Domini Mo CCCo sexagesimo quinto. [1365. máj. 5.]