In Christi nomine Amen. Nos capitulum ecclesie Iauriensis tenore presentium recognoscimus et fatemur significantes, quorum interesse contigerit, universis, quod anno a nativitate Domini Mo CCCo sexagesimo sexto, indictione IIII., pontificatus beatissimi in Christo patris et domini domini Urbani, divina providentia pape quinti, anno quarto, mensis Ianuarii die vicesima, [1366. jan. 20.] hora quasi sexta in loco nostro capitulari nobis capitulariter more solito congregatis et consedentibus frater Paulus in sacerdotio constitutus, monachus monasterii de Sacro Monte Pannonie ad romanam ecclesiam nullo medio pertinentis, ordinis Sancti Benedicti, Iauriensis dyocesis, ad nostram personaliter veniens presentiam exhibuit, presentavit et obtulit nobis in specie quasdam duas reverendissimorum in Christo patrum dominorum Stephani, archiepiscopi Tholosani, sanctissime recordationis domini Innocentii, divina providentia pape sexti et Guillelmi episcopi Tusculani cardinalis, sacri collegii reverendissimorum patrum dominorum sancte romane ecclesie cardinalium camerariorum litteras quitatorias sigillis eorundem dominorum archiepiscopi et episcopi in cedulis pergamineis, ut moris est, appensis munitas, non abrasas, non cancellatas, nec in aliqua sui parte suspectas, tenoris infrascripti, petens non omni cum instantia et requirens vice et nomine venerabilis et religiosi viri domini Ladislai, abbatis monasterii Beati Martini, domini sui et conventus eiusdem, ut, quia iidem in proximo dictas duas litteras in specie ad Romanam curiam transmittere intenderent, nos earum tenorem de verbo ad verbum ad uberiorem cautelam per notarium publicum infrascriptum in nostris litteris transscribi et nostro sigillo auttentico (!) conmuniri facere dignaremur. Quarum quidem litterarum, prime videlicet prescripti domini Stephani, archiepiscopi Tholosani, tenor per omnia dinoscitur esse talis:||
Universis presentes litteras inspecturis Stephanus, permissione divina archiepiscopus Tholosanus, domini pape camerarius, salutem in Domino. Ad universitatis vestre notitiam tenore presentium deducimus, quod venerabilis in Christo pater dominus frater Siefridus, abbas monasterii Sancti Martini Sacri Montis Pannonie ordinis Sancti Benedicti, Iauriensis dyocesis, pro totali suo conmuni servitio, in quo erat camere domini nostri Romani pontificis obligatus, centum viginti quinque florenos auri prefate camere, necnon et pro quatuor servitiis familiarium et officialium eiusdem domini nostri pape viginti quatuor florenos auri, clericis camere pro eiusdem familiaribus et ofiicialibus recipientibus per manus domini Conradi, archidiaconi Nitriensis in ecclesie Strigoniensi, tempore debito solvi fecit, de quibus sic solutis ipsum dominum abbatem, monasterium et successores suos ac bona eorum absolvimus tenore presentium et quitamus. In cuius rei testimonium presentes litteras fieri fecimus et sigilli cameriatus nostri appensione munire. Datum Avinione, die sexta mensis Martii, anno Domini millesimo trecentesimo quinquagesimo septimo, indictione decima, pontificatus sanctissimi patris et domini nostri domini Innocentii, divina providentia pape sexti, anno quinto. [1357. márc. 6.]||
Sigilli vero appensi eidem littere, prout melius vel aptius videri poterat, dispositio talis erat: Sigillum oblongum de cera rubea exprimens in se inter cetera [sub reflexione] ymagines Sanctorum apostolorum Petri cum clave super humerum sinistrum et Pauli cum gladio in manu dextra, super dextrum brachium reclinato in quibusdam tabernaculis, stantes, sub quorum pedibus duo clibei (!) continebantur, quorum unus sub Sancti Petri ymagine positus duas claves ad modum crucis reflexas habebat, alterius sub Sancti Pauli ymagine stantis ligura propter sui oppressionem manifeste cognosci non potuit; inter quos clipeos ad pedes dictarum ymaginum supra tendendo caput cum pectore quasi pontificale infulatum intra oblongum circulum haberi videbatur; sub capite autem et clipeis predictis imago parva, que ibi fuisse videbatur, propter sigilli in illa particula fracturam ad plenum considerari non poterat; in superficie autem testudinis et tabernaculorum dictarum ymaginum, de quibus supra fit mentio, quedam imago humana, cuius proprietas propter concusiones et depressionem suas totaliter agnosci non valebat; circumferentialium vero litterarum scriptura exceptis hiis: S. Stephani, propter sui obscuritatem et oppressionem vix poterat cognosci.||
Alterius, siquidem littere domini episcopi Tusculani, cardinalis superius nominati, hiusmodi seriem tenor per omnia exprimebat:||
Nos Guillelmus, miseratione divina episcopus Tusculanus, cardinalis, sacri collegii reverendorum patrum dominorum sancte Romane ecclesie cardinalium camerarius, tenore presentium recognoscimus et fatemur, quod venerabilis et religiosus vir dominus frater Siefridus, abbas monasterii Sancti Martini, Sacri Montis Pannonie, ordinis Sancti Benedicti, Iauriensis diocesis, pro totali suo communi servitio, in quo prefato collegio tenebatur, centum viginti quinque florenos auri et pro toto servitio familie dominorum cardinalium predictorum sex florenos auri, sex solidi monete currentis Auinionensis per manus magistri Conradi Nitriensis, in ecclesia Strigoniensi, nobis pro ipso collegio recipientibus tempore debito solvi fecit, de quibus sic solutis ipsum dominum abbatem, monasterium suum, successores suos et eorum bona prefati collegii nomine absolvimus et quitamus. In cuius rei testimonium presentes litteras fecimus fieri et sigilli nostri appensione muniri. Datum Avinione, die prima mensis Martii, anno a Nativitate Domini Mo CCCo quinquagesimo septimo, indictione prima, pontificatus domini Innocentii, divina providentia pape sexti, anno quinto. [1357. márc. 1.]||
Sigilli vero littere prescripte appensi, ut clarius apparebat, dispositio talis erat: Sigillum a cera rubra oblongum, habens in se tabernacula et ciboria turrita, super quorum testudine in sumitate ymago Christi crucifixi et sub eadem testitudine (!) figura Beate Marie Virginis sedens super cathedra coronata et dyadema habens in capite, puerum Iesum super genu dextrum manu dextra et in sinistra sceptrum ad modum filii super brachium eiusdem sinistre reclinatum tenens, sub cuius quidem ymaginis pedis loco quedam testudo, sub qua ymago pontificis infulati flexis genibus, manibusque sursum extensis et facie levata, ac si oraret ad ymaginem Beate Virginis supradictam, retro cuius pontificis dorsum unus et ante faciem alter clipei omnino consimiles, quorum per longum una pars vacua, altera vero quasi tres flosculos continebat; circumferalis autem scripture exaratio hec erat : S. Guillermi, Dei gratia Tusculani cardinalis.||
Habebant nichilominus ambe littere suprascripte in marginibus et in cedulis intus et foris superscriptiones et annotationes in talibus fieri in curia romana consuetas.||
Nos igitur capitulum prenotatum prenotati fratris Pauli petitionibus rationabilibus favorabili occurrentes assensu, prememoratarum duarum litterarum quitatoriarum totales absque ulla mutatione tenores, simul cum sigillorum dispositionibus et omnibus antemissis presentibus litteris per Franciscum notarium infrascriptum inseri et transumi ac in publicam formam redigi fecimus, sigillique nostri autentici appensione, simul cum eiusdem notarii signo muniri ob uberiorem rei firmitudinem et cautelam. Acta et facta sunt hec anno, indictione, pontificatas, mense, die, hora et loco supradictis.||
Et ego Franciscus Iohannis dicti ... de Curtraco Go...acensis dyocesis clericus, auctoritate imperiali notarius, suprascriptarum litterarum quitatoriarum duarum, archiepiscopi et episcopi cardinalis, quorum supra, per prelibatum fratrem Paulum supradicto capitulo Iauriensi exhibitioni, presentationi et oblationi, necnon petitioni transscriptionis ac omnibus aliis supratactis, dum sic agerentur et fierent una cum prenotatis testibus presens interfui et ea sic fieri vidi et audivi ac de mandato dominorum de capitulo antedicto pretactarum litterarum tenores et sigillorum dispositiones, simul cum omnibus antemissis propria manu transumendo seriatim nil variando et modo diligentiori, quo potui cum suis originalibus conferendo et examinando in hanc publicam formam redigi, nomineque et signo meo solitis, una cum sigillo autentico capituli sepedicti hiis appenso muniendo et vallando consignavi requisitus et rogatus per fratrem Paulum sepefatum in testimonium omnium premissorum.