Nos conventus monasterii Sancti Adriani martyris de Zala damus pro memoria, quod vir religiosus dominus Paulus, abbas monasterii Sancti Mauricii de Beel, in nostri presentia personaliter conparendo per modum protestationis nobis significare curavit, quod magister Benedictus, filius Pauli filii Heem de Debrente, quasdam tres possessiones dicti monasterii sui Polan, Ethey et Tevel vocatas per plures annos retroactos citra ex assignatione et concessiva admissione predecessorum suorum abbatum conductive et feudali federe tenuisset et teneret; sed idem nedum pretium pro earum conservatione debitum et per ipsum solvi debere assumptum annis singulis non solvisset, imo silvam in dicta possessione Polan habitam diversis conprovincialibus et specialiter de Papa pretio concedendo et per Chepanum officialem suum concedi faciendo in magna sue parte desolari et lignis evacuari fecisset et faceret incessanter in grande sui monasterii antedicti preiudicium et iacturam. Hac igitur protestatione premissa prohibuit eundem magistrum Benedictum absentem vel presentem, aliosque quoslibet ad ipsum pertinentes ab ulteriori detentione et conservatione possessionum memoratarum ac silve prenotate cuipiam et specialiter dictis populis de Papa concessione et venditione aut alia quavis dissipatione et devastatione omnium premissorum, alios etiam universos ab eorumdem emptione et occupatione atque usu, contradicendo publice coram nobis. In cuius rei testimonium presentes eidem domino abbati ad suam petitionem concessimus communi iustitia exposcente. Datum in festo Pentecostes, anno Domini millesimo trecentesimo sexagesimo sexto. [1366. máj. 24.]