Excellentissimo principi domino Lodovico, Dei gratia inclito regi Hungarie, domino eorum naturali, magister Iacobus, filius Iohannis, vicecomes et iudices nobilium comitatus Vesprimiensis humilium servitiorum debitam et indefessam promptitudinem cum perpetua fidelitate. Litteras vestre excellentie sigillo vestro anulari munitas ad inquisitiones inter alia legitime faciendas pro religioso viro fratre Paulo, abbate monasterii de Beel, per anni circulum generaliter gratiose concessas nobis exhibitas omni honore recepimus condecenti. Iuxta quarum continentiam mandatis vestris obedire curantes efficaciter, ut tenemur, Iohannem, filium Dominici, de Alason, unum ex dictis iudicibus nobilium et Stephanum, iobagionem castri Vesprimiensis, homines nostros, ad inquirendam et sciendam infrascriptorum omnimodam veritatem duximus destinandos. Qui demum ad nos reversi nobis concorditer retulerunt, quod ipsi feriis secunda et tertia proximis post festum Beati Dominici confessoris nunc preteritum [1369. aug. 6. és 7.] in comitatu Vesprimiensi predicto procedendo a nobilibus et ignobilibus, viris etiam ecclesiasticis et laicis ac ab aliis cuiusvis status et conditionis hominibus eiusdem comitatus et specialiter a vicinis et conmetaneis possessionum predicti monasterii de Beel, Polian, Borsoth et Ethey vocatarum, a quibus conveniens fuisset inquiri, palam et occulte diligenter inquirentes talem investigassent et conperissent de infrascriptis meram et plenissimam veritatem, quod, cum feria quinta proxima ante predictum festum Beati Dominici confessoris [1369. jún. 28.] iobagiones prescripti domini abbatis de Beel et sue ecclesie in villis Borsoth et Polian prenotatis residentes una cum officiali eorum pro dividendo inter ipsos et deferendo feno in terra dicti monasterii Ethey nuncupata habito per dictos videlicet populos de Borsoth pridem falcato ad memoratam villam Polian insimul convenissent, hoc percepto Iacobus, frater carnalis et famulus religiosi viri fratris Iohannis, prioris claustri de Lewld, ordinis Cartusiensis, item Georgius Magnus, dictus Nemeth, Paulus, Stephanus, Ladizlaus faber, Petrus pellifex, Paulus filius Pauli filii Pete, Georgius litteratus, filius Laurentii, villicus, Andreas filius Henchel, Iohannes dictus Sarang, Petrus Parvus, Mychael filius Pauli Barbati, Petrus faber et Gregorius carpentarius, iobagiones dicti prioris de Nova Lewld, cum politore lapidum et omnibus lapicidis apud claustrum prefatum laborantibus, nec non aliis hominibus universes de eadem Lewld, item Zenthus villicus, Franciscus, filius Mychaelis, Iohannes, filius Emerici, Elias Magnus, Nicolaus, filius Martini, Georgius et Egidius, filii Thome, Iohannes, filius Petri, Iohannes, filius Adriani, Lucas, filius Pauli, Georgius [filius Pauli] Ladizlaus dictus Darabus et Iohannes frater eius, filii Nicolai, Andreas, filius Emerici, Emericus dictus Takaro et Petrus dictus Pincust de Olewld, similiter iobagiones [prioris] predicti cum universis populis eiusdem ville seipsos per totam illam noctem balistis, arcubus, loricis, securibus, fustibus, cuspidibus, gladiis et [bicellis, aliisque diversis] generibus promptuantes, sequenti die, videlicet feria sexta [1369. jún. 29.] lucescente ho[ra] quasi prima, hii pedestres, hii in curru dicti prioris et alii [in equis properantes ex] preconcepta conspirati rancoris nequitia et ex transmissione ac iussu prelibati prioris impetu repentino super predictam villam Polyan armatis [et potentiariis] manibus hostiliter et predonum more irruentes omnes homines ibidem inventos et quos apprehendere potuissent, quosdam ex ipsis in capitibus, [quosdam vero in a]liis partibus corporum eorumdem graviter vulnerassent, alios etiam diriter verberassent et transsagittassent et similiter quam plures honestas dominas tam maritat[as, quam viduas di]ris vulneribus et gladioium et bicellorum ictibus affecissent et quarumdam brachia confregissent, item Martinum, filium Iohannis, de dicta Polian in do[mo sua coartatum] in manibus mutilantes et in capite letaliter sauciantes currui superiectum semivivum adduxissent et adhuc in dicta villa Qulewld de[tentum et vinctum ... conservarent] preterea Benedictum, viceofficialem predicti domini abbatis de dicta Polian, modo [se] in domo sua coangustatum sagittis et gladiis [miserabiliter peremissent et corpus ipsius] exanime super currum impositum ad eandem villam Qulewld asportassent, quod ad tempus manifeste apud domum [supratacti Zenthus villici de eadem manifeste servantes] postmodum pro eorum libito occultassent denegata eidem ecelesia[stica] sepultura. Insuper hiis omnibus non contenti [quam plures domos et ostia domorum et scrinia dictorum populo]rum de Polian confringendo et secando, vestes, pecunia, [pepta], mensalia, manutergia, anulos, lintea [et alias res scriniales, nec non] falcastra, vomeres et atia ferreamenta, arcus, faretras, gladios, arvinam, pernas, secures, victualia, sellas, frena et ali[a utensilia ac bona do]mestica, quecunque arripere et asportare voluissent, asportassent; item omnia pecora, videlicet boves, vaccas et vitulos, ut conscientiose percepissent [numero centum q]uadraginta, ac novem equos et totidem porcos dictorum populorum de Polian et de Borsoth, in ipsa villa Polian et in facie ipsius pos[sessionis Polian repertos auferentes, ad] antedictam villam Ouleweld et alias, quo voluissent, depulissent et adhuc detinerent nullis omnio demeritis populorum predictorum aut [etiam supradicti domini] abbatis et ad ipsum pertinentium exigentibus.||
Quibus quidem omnibus sic sollicite indagatis et perceptis ipsi homines nostri ob maiorem re[i certitudinem] ad memoratam villam Polian personaliter accedentes, multas domos, ostia et scrinia hominum de eadem modo premisso per predictos homines d[icti prioris de] Leweld presignatis confracta, dissecta et discripta, necnon cruorem prenominati Benedicti crudeliter interfecti in domo et in limine [eiusdem domus hinc inde] copiose effusum et respersum, itemque inter alia Anthonium, filium Nicolai, de eadem Polian ictu sagitte circa renes suos, Ladizlaum, filium Cosme, de Borsoth ictu gladiali in capite diriter sauciatos, Gregorium, condam villicum de eadem, sub ascella sua gladio penetratum, Nicolaum, filium Peterke de eadem, in capite et in facie graviter vulneratum, preterea dominam uxorem Stephani condam villici de dicta Polian in brachio et in capite bicello enormiter vulneratam, scapulas et dorsum domine uxoris Andree, filii Nicolai, de eadem, graviter verberatas et denigratas, brachium seu manum cuiusdam puelle, germane consortis Georgii Magni de eadem, confractum seu collisam, dominam relictam Cosme sartoris in fronte sua periculose vulneratam, preter alias dominas, quas eo, quod ex gravibus percussionibus decumberent videre non expedisset, dictamque possessionem Polian per facta enormia prenotata omnibus animalibus, bonis et rebus, ut premittitur, penitus spoliatam et evacuatam fide conspexissent oculata manifeste, per que etiam facta non minus predicta possessio Borsoth foret in parte maxima desolata in grande et inconputabile predicti monasterii de Beel et sui abbatis derogamen, preiudicium et iacturam. Datum in Wasarhel, decimo die inquisitionis prenotate, anno Domini millesimo trecentesimo sexagesimo nono. [1369. aug. 16.]||
[Hátulján]: Domino regi pro religioso viro domino fratre Paulo abbate de Beel contra priorem et populos de Lewld super factis intronotatis inquisitoria.