Nos comes Nicolaus de Zeech, iudex curie domini Lodovici, Dei gratia regis Hungarie, memorie conmendamus, quod Aron, filius Iacobi, de Vizlou personaliter iuxta continentiam litterarum comitis Stephani Bubeek, pridem similiter iudicis curie regie, predecessoris nostre bone memorie, prorogatoriarum in octavis festi Beati Georgii martiris in anno Domini Mo CCCo LXo octavo preteritis [1368. máj. 1.] in figura iudicii eiusdem comitis Stephani conparendo contra religiosum virum fratrem Ladislaum, abbatem ecclesie Sancti Martini de Sacro Monte Panonie, quasdam quatuor litteras, unam scilicet domini Nicolai Konth, pridem palatini, adiudicatoriam et aliam vicecomitis et iudicum nobilium comitatus Symigiensis ipsi palatino rescriptionalem ac tertiam capituli ecclesie Quinqueecclesiensis inquisitoriam, quartam vero magistri Iohannis, filii Oliverii, comitis Symigiensis, affirmatoriam in diversis annis et terminis sub variis formis confectas, asserens actionem suam litteris contineri in eisdem, eidem comiti Stephano, prout per litteras eiusdem informabamur, presentasset.||
Quarum prima, scilicet ipsius domini palatini in anno Domini Mo CCCo LXo sexto, sexto die congregationis sue generalis universitati nobilium dicti comitatus feria secunda proxima post octavas festi Beati Georgii martiris [1366. máj. 9.] prope villam Sumugvar celebrata confecta declararat inter cetera, quod in ipsa congregatione dicti palatini Aron, filiis Iacobi, de Vizlou, de medio aliorum personaliter exsurgendo proposuisset tali modo, quod Dominicus, officialis domini abbatis Sancti Martini de Sacro Monte Panonie in Sancto Ladislao constitutus, una cum populis et iobagionibus de eadem feria sexta proxima post festum Beati Georgii martiris tunc proxima preteritum [1366. máj. 1.] Clementem iobagionem et Petrum sartorem, famulum suos(!) in possessionibus suis Zenthmargytha et Karan vocatis residentes de eisdem possessionibus pro debitis seu collectis eorum habita promulgatione cuiusdam constitutionis regalis potentialiter ad eandem possessionem Zenthlachlou vocatam adduxisset; quo audito, quia Iohannes, sacerdos de dicta Zentlachlou, pro eodem domino abbate cum procuratoriis litteris eiusdem exsurgendo ipsum dominum abbatem ex parte predictorum populorum de Zentlachlou, iobagionem suorum, iudicium et iustitiam facere velle indicasset, ideo idem palatinus conmisisset, ut idem dominus abbas in octavis festi Nativitatis Beati Iohannis Baptiste tunc venturis [1366. júl. 1.] in predicta villa Zenthlachlou ipsi Aron, filio Iacobi, super premissis ex parte prefatorum iobagionum suorum coram uno ex iudicibus nobilium dicti comitatus iuxta regni consuetudinem iudicium et iustitiam facere et inpendere teneretur, ipsiusque satisfactionis seriem in litteris eorundem vicecomitis et iudicum nobilium ad octavas festi Beati Iacobi apostoli tunc affuturas [1366. aug. 1.] idem palatinus sibi in Wyssegrad voluisset reportare.||
Series vero ipsarum litterarum vicecomitis et iudicum nobilium ipsum dominum abbatem ex parte predictorum iobagionum suorum die et loco prenotatis nullam satisfactionem ipsi Aron, filio Iacobi, inpendisse declarasset manifeste.||
Ipsius vero littere magistri Iohannis comitis et iudicum nobilium comitatus Symigiensis affirmatorie continentia inter cetera denotasset, quod iurati assessores in congregatione sua universitati nobilium dicti comitatus de regio litteratorio mandato sabbato proximo post festum Corporis Christi in anno tunc proxime transacto preteritum [1367. jún. 19.] in Sumugvar celebrata electi et constituti ad fidem eorum Deo debitam, fidelitatemque domino nostro regi et sue sacre corone regie observandam, tacto vivifice crucis ligno prestitam per ipsum magistrum Iohannem requisiti taliter affirmassent, quod Dominicus, filius Syke, officialis domini Ladislai, abbatis monasterii Sancti Martini de Sacro Monte Panonie in villa Zenthlachlou constitutus, una cum populis eiusdem ville et suarum pertinentiarum armatis manibus et potentiariis insurgentes circa festum Nativitatis Domini tunc proxime preteritum ad possessionem ipsius Aron Vyfalu vocatam venissent et de eadem duos iobagiones suos cum rebus eorum abduxisset collecta decimali, in qua fuissent taxati, non soluta; item demum ipsi officialis et populi modo simili potentialiter ad domum ipsius Aron in Vyfalu habitam veniendo, fossata prati sui ibidem habiti replevissent et destruxissent, insuper silvam suam succidissent et de lignis in eadem succisis pontem per fruges suas in propria terra sua habitas fecissent, alias etiam iniurias et dampna multa sibi violenter intulissent; item predicti iobagiones de eadem Zentlachlou ad aliam possessionem eiusdem Aron Zenthmargytha vocatam accedendo unum bovem recepissent et in tribus pensis denariorum restituissent et tandem iterato sexaginta boves, suos recepissent et quemlibet in redemptionem restituissent.||
Tenor autem prefate littere ipsius capituli Quinqueecclesiensis inquisitorialis domino nostro regi rescripte declarasset, quod regius et ipsius capituli homines in eisdem litteris nominati ad regiumque mandatum transmissi, ab omnibus, quibus decuisset et licuisset, talem scivissent veritatem, quod Gregorius, oficialis domini Ladislai, abbatis de Sacro Monte Panonie, in villa Zenthlachlou constitutus una cum populis seu iobagionibus de eadem feria tertia proxima post festum Beati Galli confessoris tunc proxime preteritum [1367. okt. 19.] ad possessionem prefati Aron, filii Iacobi, Karan vocatam potentialiter veniendo hostia quarundam domorum iobagionum eiusdem confregissent et quosdam iobagiones suos graviter verberassent ac quasdam duas mulieres ibidem graviter vulnerassent, lite tamen pendente inter ipsos.||
Quibus quidem litteris exhibitis et expositis, quia Nicolaus de Gench pro eodem domino abbate cum procuratoriis litteris eiusdem exsurgendo dictum dominum abbatem ex parte dictorum iobagionem suorum eidem Aron satisfactionem inpendere velle allegasset, dictus vero dominus abbas ex parte prefatorum iobagionum suorum iuxta adiudicationem dicti palatini ipsi Aron satisfactionem non inpendisse ex serie dictarum litterarum vicecomitis et iudicum nobilium reperiebatur, ideo idem comes Stephanus eundem pro ipsius satisfactionis non inpensione in iudicio trium marcarum in termino reportationis seriei infrascriptorum deponendo convictum fore decernens conmisisset eo modo, ut idem dominus abbas in quindenis festi Nativitatis Beati Iohannis Baptiste tunc venturis [1368. júl. 8.] presente homine regio in eisdem litteri nominato et testimonio dicti capituli Quinqueecclesiensis, quod per ipsum ad id serie litterarum suarum amicabiliter transmitti postulasset, in dicta villa Zenthlachlou et parte predictorum iobagionum suorum super premissis ipsi Aron omnimode iustitie et satisfactionis explementum iuxta regni consuetudinem inpendere et de hinc ipsius satisfactionis et iustitie inpensionis seriem partes in litteris dicti capituli ad octavas festi Beati Iacobi apostoli similiter tunc affuturas [1368. aug. 1.] eidem comiti Stephano reportare tenerentur.||
Et cum discussio premissorum ab eisdem octavis festi Beati Iacobi apostoli primo iuxta continentiam litterarum predicti comitis Stephani, demum vero ipso comite Stephano, Domino volente, ab hac luce decesso, ipsoque honore iudicatus curie regie per regiam clementiam nobis collato, secundum continentiam litterarum nostrarum prorogatoriarum quibusdam prorogationum cautelis et terminis intervenientibus ad octavas festi Nativitatis Beati Iohannis Baptiste in anno proxime transacto preteritas [1370. júl. 1.] dilative extitisset, tandem ipsis octavis occurrentibus Nicolao litterato pro dicto domino abbate cum procuratoriis litteris eiusdem coram nobis astante, idem Aron ad nostram accedens presentiam quasdam litteras dicti capituli Quinqueecclesiensis memorialiter confectus nobis presentarat inter cetera declarantes, quod, cum ipsum capitulum Quinqueecclesiense iuxta continentiam dictarum litterarum comitis Stephani adiudicatoriarum una cum Philippo de Bogka, homine regis, magistrum Lucam, sacerdotem ecclesie Beati regis Stephani de civitate Quinqueecclesiensi et prebendarium, ad videndam et ad audiendam satisfactionem et iustitie exhibitionis conplementum per religiosum virum dominum Ladislaum, abbatem de Sacro Monte Panonye, in dictis quindenis festi Nativitatis Beati Iohannis Baptiste in villa Zenthlachlov Aron, filio Iacobi, de Vyzlou ex parte officialis et iobagionum eiusdem domini abbatis faciendam et inpendendam modo in eisdem litteris dicti comitis Stephani contento pro ipsorum testimonio transmisisset fide dignum, ipsi postmodum ad ipsum capitulum reversi eidem concorditer retulissent, quod idem Aron assumptis secum probis et nobilibus hominibus, eisdemque regio et ipsius capituli hominibus presentibus ad predictam villam Zenthlachlov ipsius domini Ladislai abbatis in dictis quindenis festi Nativitatis Beati Iohannis Baptiste ipsam satisfactionem et iustitie inpensionem ex parte eiusdem domini abbatis recepturus accessisset, qui quidem dominus abbas non venisset, nec misisset aliquam pro se personam ydoneam ad ipsam satisfactionem et iustitie inpensionem eidem Aron faciendam, ipso Aron una cum nobilibus secum adductis ac regio et ipsius capituli Quinqueecclesiensis hominibus per totum diem ipsarum quindenarum inibi expectante.||
Quibus quidem litteris exhibitis annotatus Aron, filius Iacobi, ex parte dicti abbatis per nos sibi in premissis iudicium et iustitiam postularat elargiri equitate suadente.||
Unde, quia prefatus procurator ipsius domini abbatis ex parte dictorum iobagionum suorum de Zenthlachlov eundem dominum abbatem ipsi Aron satisfactionem inpendere velle allegarat, idem vero dominus abbas ex parte ipsorum iobagionum suorum obmissa premisse ipsius comitis Stephani iudiciarie deliberationis forma nullam [satisfactionem inpen]disse ex serie dictarum litterarum ipsius capituli Quinqueecclesiensis reperiebatur, ideo eundem dominum abbatem pro ipsius satisfactionis non inpensione in iudicio trium marcarum convictum fore decernentes conmiseramus eo modo, ut idem dominus abbas in octavis festi Nativitatis Beate Virginis tunc venturis [1370. szept. 15.] coram homine vicecomitis et uno ex iudicibus nobilium comitatus Symigiensis, quos per ipsos ad premissa litteratorie amicabiliter transmitti postularamus ... in dicta villa Zenthlachlov ipsi Aron omnimode iustitie et satisfactionis conplementum iuxta regni consuetudinem inpendere et de hinc ipsius satisfactionis et iustitie inpensionis seriem partes in litteris dictorum vicecomitis et iudicum nobilium ad octavas festi Beati Mychaelis archangeli tunc venturas [1370. okt. 6.] nobis reportare tenerentur.||
Et, cum discussio premissorum ab eisdem octavis inter partes prenotatas quibusdam prorogationum cautelis et terminis intervenientibus iuxta continentiam litterarum nostrarum dilatoriarum ad octavas festi Beati Georgii martiris tunc proxime venturas [1371. máj. 1.] protelative devenisset, tandem ipsis octavis adherentibus prefatus Aron personaliter, presente Nicolao Crispo, qui pro prefato domino Ladislao abbate cum procuratoriis litteris eiusdem coram nobis adherebat, in nostram accedendo presentiam quasdam litteras vicecomitis et iudicum nobilium super premissis memorialiter confectas nobis presentarat inter cetera declarantes, quod ipsi vicecomes et iudices nobilium iuxta continentiam premissarum litterarum nostrarum Iohannem, filium Hedrici et Nicolaum, filium Ladislai, duos ex ipsis ad audiendum et videndum premissa duxissent destinandum; demum iidem ad eos reversi concorditer retulissent, quod ipsi in dictis octavis festi Nativitatis Beate Virginis [1370. szept. 15.] ad dictam villam Zenthlachlou accessissent, ubi in presentia ipsorum et aliorum nobilium virorum idem Aron octo homines, iobagiones videlicet dicti domini abbatis de dicta Zenthlachlov, scilicet Thomam, filium Demetrii, Stephanum dictum Fodor, Iohannem dictum Nerges, Petrum dictum Bachov, Petrum dictum Tar, Kereztus, filium Nicolai, Petrum, filium Demetrii et Dyonisium, filium Mychaelis dicti Thout, in premissis culpabiles fore allegasset; quibus perceptis prenotati octo homines personaliter exurgendo respondissent ex adverso, quod ipsi in totali premissa actione dicti Aron innocentes essent penitus et inmunes et ibidem in eo, quod ipsi innocentes sint, quilibet eorum sigillum duelli eidem Aron assignasset; unde perceptis premissis magister Ladislaus, officialis dicti domini abbatis adiudicasset, quod quilibet dictorum octo hominum contra ipsum Aron pugilem congressum statuere et pugnari facere tenerentur super eo, quod ipsi in totali premissa acquisitione dicti Aron innocentes sint et immunes; prefatus vero Aron adiudicationem predicti magistri Ladislai acceptando assumpsisset, sed ipsam causam ad deliberationem baronum submisisset in eo, utrum contra dictos octo homines unum pugilem vel contra quemlibet eorundem hominum pro se statuere et pugnari iacere deberet.||
Quarum litterarum exhibitionibus factis et perlectis continentiis earundem, partibus prescriptis sibi utrumque iuris equitatem in premissis inpertiri postulantibus, quia prefatus dominus Ladislaus abbas ex parte predictorum iobagionum suorum pluribus vicibus, ut premittitur, super premissis satisfactionem inpendere recusarat, idemque Aron premissam suam actionem prescriptis litteris ipsius capituli Quinqueecclesiensis ac dictorum vicecomitis et iudicum nobilium comitatus Symigiensis affirmatoriis, ut premittur, declararat, procurator autem dicti abbatis predictos iobagiones eiusdem ad unius pugilis dimicationem submittere nolle, ipse etiam Aron octo duella contra dictos octo homines dimicari facere non posse contrariose allegarant, pro eo una cum regni nobilibus nobiscum in iudicio adherentibus conmiseramus iudicantes, ut quilibet predictorum octo iobagionum ipsius domini abbatis duodecimo se, videlicet undecim sibi adiunctis nobilibus, vel quadragesimo octo se hominibus popularibus quilibet eorum in octavis festi Omnium Sanctorum tunc proxime venturis [1371. nov. 1.] coram conventu ecclesie Symigiensis super eo, quod ipsi in totali premissa acquisitione prefati Aron innocentes sint penitus et inmunes sacramenta prestare tenerentur et post hec ipsorum iuramentorum seriem per partes in litteris dicti conventus ad octavas festi Beati Martini confessoris similiter tunc affuturas [1371. nov. 18.] nobis volueramus reportari.||
Tandem ipsis octavis instantibus Petrus carpentarius pro prelibatis Thoma, Stephano, Iohanne Nerges, Petro Bochou, Petro Tar dictus, Kereztus, Petro, filio Demetri et Dyonisio iobagionibus annotati domini abbatis cum procuratoriis dicti conventus Simigiensis ad nostram veniendo presentiam litteras eiusdem conventus Symigiensis super premissis iuramentalibus depositionibus memorialiter confectas nobis presentavit, in quibus inter cetera predictos octo iobagiones annotati domini abbatis, videlicet per quemlibet eorum quadragesimo octo se hominibus popularibus premissa sacramenta eorum super premissis iuxta predictam nostram iudiciarium conmissionem termino et loco in prefixis rite et legitime deposita extitisse conperimus seriose; et quia tempore repositionis seriei prescriptorum iuramentorum depositionibus eorundem nemo contradicebat, pro eo nos visis predictis litteris annotati conventus Symigiensis omnes prescriptos iobagiones pretitulati domini abbatis super annotata acquisitione prelibati Aron reddidimus et conmisimus expeditos vigore presentium mediante. Datum in Wyssegrad, sedecimo die octavarum festi Beati Martini confessoris predictarum, anno Domini Mo CCCo LXXo primo. [1371. dec. 3.]