Nos comes Petrus Zudor, iudex curie serenissimi et magnifici principis, domini Lodovici, Dei gratia incliti regis Hungarie, Polonie, Dalmatie etc., memoria conmendantes tenore presentium significamus, quibus expedit, universis, quod religiosus vir frater Paulus, abbas ecclesie Sancti Mauricii de Beel, personaliter iuxta continentiam litterarum comitis capelle regie citatoriarum, ipsam citationem hic in Wyssegrad facie ad faciem factam fuisse denotantium feria sexta proxima post festum Conversionis Sancti Pauli apostoli [1373. jan. 28.] in figura nostri iudicii conparendo contra religiosum virum fratrem Mychaelem, priorem ordinis fratrum Predicatorum claustri de Komaron, proposuit tali modo, quod dictus dominus prior tribus feriis tertiis proxime preteritis cum fratribus et famulis suis laicis ad locum fori piscium et aliarum rerum venalium in portu Komaroniensi super et iuxta fluvium Vagh more solito stantis veniendo, tributum de pisscibus per piscatores et mercatores ac alios hominis ad ipsum forum forizandi causa adductis, emptis et venditis in eodem partim cum pisscibus, partim vero cum denariis potentialiter extorsisset et tributario ipsius scilicet abbatis dari prohibuisset, ipsumque tributum pro se occupare et eum de dominio eiusdem excludere niteretur;||
ubi idem dominus abbas quasdam litteras privilegiales viri magnifici comitis Stephani Bubeek, olim similiter iudicis curie regie, hic in Wyssegrad quintodecimo die octavarum festi Epiphaniarum Domini anno eiusdem millesimo trecentesimo sexagesimo septimo [1367. jan. 27.] confectas nobis presentavit, declarantes inter alia, quod, cum idem dominus abbas fratrem Ladizlaum, priorem et conventum dicti claustri de Kamaron ratione dicti tributi in presentiam regiam legitime in causam attraxisset, tandem ipsa causa inter partes ventilante primo idem dominus abbas in eiusdem comitis Stephani accedendo presentiam, quasdam duas litteras, unam dominii Karoli, pridem regis Hungarie, sub anno millesimo trecentesimo tricesimo, quinto Idus Martii, [1330. márc. 11.] regni autem sui anno similiter tricesimo sub sigillo suo in partibus Transalpinis casualiter deperdito emanatam et aliam magnifici viri Nicolai filii Gyleti, condam palatini, patentem eidem comiti Stephano demonstrasset, in quarum unius, scilicet regalis, quasdam litteras privilegiales condam domini Bele regis sub anno Domini millesimo ducentesimo quadragesimo sexto, secundo Idus Novembris, [1246. nov. 12.] regni autem sui anno undecimo emanatas, tenorem cuiusdam privilegii Sanctissimi regis Stephani anno dominice incarnationis millesimo tricesimo septimo [1037.] confecti transscribentes transsumptive in se continentes serie inter omnia alia per ipsum Sanctissimum Stephanum regem inter alias suas donationes eidem monasterio de Beel factas, tributum portus et fori de Kamaron eidem perpetuo collatum fuisse idem comes Stephanus adinvenisset manifeste;||
in alterius vero littere, scilicet ipsius domini palatini in anno Domini millesimo trecentesimo, quadragesimo tertio, quintodecimo die octavarum festi Beati Georgii martiris [1343. máj. 15.] emanate continentia repertum fuisset, quod, cum frater Nicolaus, abbas de Beel, anno dominice incarnationis millesimo trecentesimo quadragesimo primo in congregatione generali universitati nobilium Iauriensis et Komaroniensis comitatuum feria secunda proxima post festum Omnium Sanctorum [1341. nov. 5.] prope civitatem Iauriensem per dominum Willermum Drugeth, tunc palatinum, celebrate consurgendo, duas partes tributi portus et fori de Komaron prefato monasterio de Beel efficacissimorum instrumentorum vigoribus pertinere debere et per magistrum Donch, comitem Komaroniensem, occupatas fore allegasset;||
ipsa causa diutius ventilata, tandem ipse dominus Nicolaus palatinus in ipsius honore palatinatus succedendo visis partium instrumentis ipsum tributum de Kamaron ad ipsum monasterium pertinere debere agnosscens duas partes tributi fori et portus prenotati, quas tunc idem abbas requisivisset, eidem monasterio de Beel perpetuo possidendas adiudicasset.||
Quibus exhibitis prefatus Ladizlaus prior et frater Iohannes de predicto claustro pro se et pro tota conmunitate coram eodem comite Stephano Bubeek conparendo, quasdam tres litteras, unam condam magistri Pauli de Komaron privilegialem et aliam magistri Donch comitis de Zolio et tertiam predicti domini nostri regis patentem eidem comiti Stephano presentassent.||
In quarum unius, scilicet ipsius magistri Pauli littere anno Domini millesimo trecentesimo quinto [1305.] emanate serie repertum fuisset, quod ipse magister Paulus ecclesie in honorem Sancte Marie per ipsum in Komarino constructe et fratribus in eadem Deo iugiter famulantibus pro salute anime sue tributum pisscium in toto super aqua Vagh et Danubii versus Strigonium vel Budam descendentium sive intra noves sive iuxta eas in fiscellis seu instrumentis, quod proprie barkas vocarent tam die fori, quam aliis diebus aut horis, quocunque portarentur, a quibus singuli duodecim denarii a primis temporibus dari et exigi consuevissent pro tributo et singuli duo pissces et etiam de aliis pisscibus, a quibus minus recipi deberet, dedisset perpetuo tenendum et possidendum preter usones aut pissces, qui ponerentur ad currum et in curru transferrentur et etiam preter pissciferos Teutonicos, qui temletesek appellantur, pisces ementes et salsantes, quorum tributa pro se reservasset et pariter retinuisset sicut alia tributa sua altiora et maiora.||
Relique vero due littere, scilicet prefati magistri Donch anno Domini millesimo trecentesimo tricesimo secundo in Kamaron in festo Nativitatis Beati Iohannis Baptiste [1332. jún. 24.] et altera ipsius domini nostri regis in anno Domini millesimo trecentesimo quadragesimo septimo Bude feria quarta proxima ante festum Purificationis Beate Virginis [1347. febr. 1.] emanate, inter alia predictas litteras dicti magistri Pauli privilegiales de verbo ad verbum transscribendo confirmassent seriose.||
Quarum litterarum exhibitionibus factis, quia prelibatus Sanctissimus rex Stephanus annotate ecclesie Sancti Mauricii de Beel tributum portus et fori de Kamaron perpetuo contulisse, prelibatus vero frater Nicolaus, condam abbas, nomine iuris sue ecclesie duas partes dicti tributi fori et portus de Kamaron a prefato magistro Donch coram dicto Nicolao palatino vigore prescripti privilegii Sancti regis Stephani reobtinuisse, predictusque magister Paulus de Komaron ipsis fratribus de eadem Komaron solum tributum pisscium super aqua Vagh et Danubii versus Strigonium vel Budam descendentium sive intra naves, sive iuxta eas in fisscellis tam die fori, quam aliis diebus aut horis, quocunque portarentur, perpetuo possidendum dedisse ex continentiis predictarum litterarum predictorum magistrorum Pauli et Donch ac domini regis adinventi fuissent, eedem etiam littere de ipso tributo portus et fori nullam fecissent mentionem, ideo ipse comes Stephanus una cum prelatis, baronibus et regni proceribus secum adiudicantibus prescriptam totalem partem dicti tributi fori de Komaron, quam dictus Paulus, abbas de Beel, a dictis fratribus de Komaron ordine iudiciario requisivisset, eidem Paulo abbati et sue ecclesie vigore premissorum suorum instrumentorum adiudicasset perpetuo possidendam, predictum tributum pisscium super dictis aquis Wagh et Danubii versus Strigonium vel Budam descendentium annotatis fratribus claustri de Kamaron iure eis attinenti similiter perpetuo possidendum relinquendo, conmittens, ut dicti fratres tributum eorum premissum in foro de Komaron prenotato a tunc nequequam recipere possent, sed in aliis locis iuxta seriem instrumentorum eorum premissorum liberam recipiendi haberent facultatem.||
Quibus exhibitis prenotatus frater Mychael, prior predicti claustri, personaliter coram nobis adherendo par predicte privilegialis littere ipsius comitis Stephani in superioribus sensualiter conscripti similiter privilegialiter emanatum cum prenotatis certis suis instrumentis in presentia dicti comitis Stephani per ipsum fratrem Ladizlaum, antecessorem suum priorem, presentatis exhibens respondit tali modo, quod ipse de tributo pisscium in loco dicti fori ipsi domino abbati debito nichil recepisset, nec recipi fecisset, sed ab hominibus de loco tributi pisscium sibi debiti tributo eorum non soluto recedentibus et in eodem foro tandem repertis ipsum tributum suum exegisset.||
Quibus habitis, licet idem dominus abbas se in sua acquisitione premissa ad solius dicti domini Mychaelis prioris iuramentum sola sua in persona deponendum conmittere promptum fore retulerit et ipse prior id acceptaverit, tamen tandem idem dominus abbas ipsum iuramentum per eundem dominum priorem in premissis deponendum benivole indulsit et relaxavit, ipsum priorem super premisso facto conmittendo expeditum. Quibus habitis eedem partes eis in premissis iuris equitatem per nos petierunt elargiri.||
Verum quia per ipsum Beatissimum regem Stephanum, ut prenotatur, inter predictas alias suas piissimas donationes tributum portus et fori de Komaron eidem ecclesie Sancti Mauricii de Beel collatum fuisse, dictusque dominus frater Nicolaus, condam abbas eiusdem ecclesie de Beel, in presentia dicti domini palatini duas partes eiusdem tributi a dicto magistro Donch, ac tandem, ut prenotatur, frater Paulus totalem partem ipsius tributi portus et fori ab ipsis fratre Ladizlao condam priore et suis fratribus in conspectu ipsius comitis Stephani premissis munimentis et rationibus iuridice reobtinuisse, dictusque condam magister Paulus dicto claustro solum tributum pisscium in toto super aqua Wagh et Danubii versus Strigonium vel Budam descendentium sive intra naves, sive iuxta eas in fiscellis tam die fori, quam aliis diebus aut horis quocunque portarentur, a quibus singuli duodecim denariorum ac duo pisces dari consuevissent, de aliis autem pisscibus, a quibus minus recipi deberet dedisse ex premissis litteralibus instrumentis partium manifeste reperiebatur, pro eo una cum prelatis, baronibus et regni nobilibus nobiscum adiudicantibus premissis omnibus diligenter consideratis prescriptum totale tributum portus et fori de Komaron secundum seriem prenotati privilegii dicti Sanctissimi regis Stephani et ceterorum instrumentorum ipsius ecclesie de Beel predictorum eidem abbati et sue ecclesie prenotate, predictum vero tributum pisscium super dictis aquis Wagh et Danubii versus Strigonium vel Budam descendentium annotato claustro de Komaron fratribus Deo iugiter in ipso famulantibus similiter secundum seriem instrumentorum suorum prescriptorum eo iure, quo eis dinosscuntur pertinere perpetuo possidenda adiudicavimus et conmisimus in perpetuum possidere, tenere, pariter et habere, salvis iuribus alienis, eo modo, quod dicti prior et fratres ipsius claustri dictum tributum eorum non in loco fori de dicta Komaron, sed in aliis locis consuetis, quibus videlicet secundum continentiam instrumentorum eorum congruit, recipere valeant atque possint. In cuius rei memoriam, firmitatemque perpetuam presentes eidem domino Paulo abbati et sue ecclesie concessimus litteras nostras privilegiales pendentis sigilli nostri munimine roboratas. Datum in Wyssegrad quinto die ferie sexto proxime post festum Conversionis Beati Pauli apostoli prenotatum, anno Domini millesimo trecentesimo septuagesimo tertio. [1373. febr. 1.]