Nicolaus lector et canonicus ecclesie Iauriensis et magister Georgius canonicus eiusdem ecclesie, subcollectores ad infrascripta specialiter deputati universis presentes litteras inspecturis salutem in Domino. Litteras honorabilis viri domini Petri Stephani, prepositi Dimisiensis, nunctii domini nostri pape in regnis Hungarie et Polonie collectoris reddituum et annatarum domini pape recepimus hunc tenorem continentes:||
Petrus Stephani, canonicus ecclesie Sagoniensis, in regnis Hungarie et Polonie apostolice sedis nunctius et collector venerabili et circumspecto viro domino Nicolao, lectori ecclesie Iauriensis, subcollectori nostro salutem in Domino et mandatis nostris, ymo verius apostolicis firmiter obedire. Quia alias coram vobis et quibusdam aliis dominis de capitulo dicte ecclesie Iauriensis litteras de potestate auctoritate apostolica nobis comissa legi et publicari fecimus, ideo eas presentibus inserere non curamus; verum cum aliis arduis camere apostolice negotiis canonice ocupati ad alias partes nos transire oporteat, de vestris scientia et fidelitate plenam in Domino fiduciam obtinentes vices nostras quo ad infrascripta vobis tenore presentium conmittimus, quousque ipsas ad nos duxerimus revocandas, dantes et concedentes vobis auctoritate apostolica supradictam plenam et liberam potestatem, tum canonicis et personis ecclesiasticis dicte ecclesie civitatis et diocesis Iauriensis, quibus per sedem apostolicam de beneficiis ipsorum provisum extitit vel mandatum est provideri vel confirmata per eandem sedem existunt aut qui ipsa beneficia minus iuste obtinent vel fructus inde percipiunt super mediis annualibus fructibus seu mediis annuatis dicte curie apostolice debitis et reservatis in vero et iusto valore ipsorum beneficiorum exinponendi et terminos ad satisfaciendum asignandum et pecunias, item huiusmodi conpositionum debitas nomine prefate curie apostolice petendum et recipiendum et de receptis quietandum, necnon quoscunque debitores vel qui ipsa beneficia obtinent vel fructus percipiunt eadem auctoritate providendum, ipsosque et eorum singulos per excommunicationis, suspensionis et interdicti ac ingressus ecclesie sententias conpellendi et agravandi et alias omnem censuram ecclesiasticam in eos et eorum quemlibet exercendi, prout vobis videbitur expedire.||
Nos itaque volentes mandatum ipsius exequi reverenter, ut debemus, religiosum virum fratrem Dominicum abbatem monasterii Sancti Martini de Sacro Monte Pannonie, semel, secundo et tertio monuimus, ut de medietate reddituum eiusdem monasterii Sancti Martini camere domini pape satisfaciat, ut tenetur. Qui nostris monitionibus contumaciter non parens prelibatis terminis sibi asignatis, unde nos predictum dominum abbatem et conventum et monasterium subicimus ecclesiastico interdicto, insuper sententias excommunicationis et interdicti in eundem monasterium, abbatem et conventum promulgatas in aliis litteris et processibus supradicti domini Petri collectoris pronunctiamus eosdem incurrisse. Datum Iaurini, duodecimo Kalendas mensis Aprilis. [1374. ápr. 21.]