Serenissimo principi domino Lodovico, Dei gratia inclito regi Hungarie, Polonie, Dalmatie etc., suo domino gratioso conventus monasterii Sancti Martini de Sacro Monte Pannonie orationes in Christo assiduas et devotas. Litteris vestre excellentie pro religioso viro domino fratre Paulo, abbate ecclesie de Beel, ad inquisitiones et prohibitiones inter alia legitime faciendas per anni circulum generalibus omni, quo decuit, honore receptis, iuxta continentiam earumdem una cum Iohanne, filio Elie, de Perechke, homine culminis vestri, Iacobum litteratum, hominem nostrum, ad infrascripta sagaciter exequenda transmisimus pro testimonio fide dignum. Qui demum ad nos reversi nobis concorditer retulerunt, quod ipsi feria tertia proxima post festum Beate Margarete virginis nunc preterite [1374. júl. 18.] in civitate vestra Komaroniensi a nobilibus et ignobilibus ac ab aliis diversis hominibus tam ecclesiasticis quam laicis, ipso die ibidem ad forum confluentibus et repertis, a quibus expediens extitisset inquiri, solliciter inquirendo hanc conperissent omnimodam et scivissent veritatem, quod ab eo tempore incipiendo, quo bone memorie frater Nicolaus, olim abbas, predecessor domini Pauli predicti, duas partes tributi portus et fori de Kamaron a magistro Donch, tunc domino de eodem Kamaron, iuris ordine reobtinuisset, usque ad hec tempora omnes abbates loci prescripti et in personis eorumdem famuli ipsorum et alii, qui ab ipsis partes eorum tributarias prenotatas conductive per tempora conservassent, de navibus saliferis, que ad locum fori adduci consueverunt et solent et de quibus sales causa vendendi in eodem loco fori exponuntur, partem tributariam salium in specie ratione tributi fori, quemadmodum pro castro seu dominis castri Kamaroniensis recipiebatur, pro dominis abbatibus et ecclesia prenotatis, eorumque nominibus et iure semper percepissent et habuissent equaliter pacifice et quiete; cuius contrarii nullus recordaretur, excepto, quod a proximis hiis diebus incipiens Trepk, filius Nicolai, castellanus castri antedicti, ad sinistram informationem quorumdam minus iuste suadentium, medietatem dicti tributi fori salium pro dictis abbatibus et ecclesia, ut premittitur, prius recipi et haberi solitam occupando et alteri medietati pro castro predicto recipi consuete applicando prefatum dominum Paulum abbatem et suum tributarium ausu proprio exclusisset de eadem et exclusos esse faceret indebite et iniuste in ipsius abbatis, sueque ecclesie derogamen nimium et iacturam. Quibus sic inquirendo perceptis ipsi vester et noster homines ad antedictum Trepk apud predictum castrum tunc personaliter existentem accedendo, ipsum ab ulteriori occupativa detentione dicte partis tributi fori salium dominum abbatem et ecclesiam prelibatos, ut prescribitur, contingentis legitime et manifeste prohibuissent; qui respondisset se tali prohibitioni assentire et stare nolle, donec adhuc a civibus de dicta Kamaron instructionem super hiis susciperet pleniorem; sicque ipsum negotium inutiliter distulissent. Datum sexto die executionis premissorum, anno Domini millesimo trecentesimo septuagesimo quarto. [1374. júl. 23.]