Nos conventus monasterii Sancti Martini de Sacro Monte Pannonie damus pro memoria, quod, cum nos receptis litteris annualibus domini nostri regis ad inquisitiones et alios processus legitimos pro domino Paulo, abbate de Beel et sua ecclesia faciendos una cum Michaele de Ech, homine regio in eisdem inter alios nominato, nostrum hominem dominum Dyonisium, plebanum ecclesie Sancti Martini de Rovazd, ad exequendum huiusmodi processus necessarios transmisissemus pro testimonio fide dignum, tandem iidem ad nos insimul redeuntes nobis uniformiter inter alia retulerunt, quod ipsi in festo Beatorum Gordiani et Epimachi martirum nunc preterito [1378. máj. 10.] in executionibus negotiorum procedentes predictorum in comitatu Vesprimiensi a nobilibus et ignobilibus ac ab aliis, a quibus conveniens extitisset inquiri, sollicite sciscitando hanc conperissent inter cetera meram veritatem, quod feria quinta proxima post festum Beati Iohannis apostoli ante portam Latinam tunc transacta, [1378. máj. 13.] in villa Ugud predictus dominus Paulus abbas ex una et Michael, filius Mathyus, de Beche parte ex altera per ingenuos viros, magistros Iohannem, filium Thome, de Segwar et Petrum, filium Chenyk, de dicta Ugud illuc convocati in factis metarum inter ipsos litigiosarum et omnium iniuriarum per iam dictum Michaelem prefato domino abbati et ad se pertinentibus hactenus illatarum se se amicabili ordinationi et reformationi predictorum magistrorum Iohannis et Petri ac aliorum proborum et nobilium virorum per ipsas partes feria quarta, videlicet in festo Sanctorum martirum Nerei, Achillei atque Pancratii proxime tunc venturo [1378. máj. 12.] in faciem possessionis dicte ecclesie de Beel, Polyan vocate adducendorum faciende benivole et concorditer submisissent; ipso itaque prefixo termino occurrente prescriptis magistris Iohanne et Petro, necnon domino Benedicto, condam Bulgarorum bano, Thoma dicto Kachar, Iohanne et Nicolao, filiis Iohannis, filii Andree de Rennek et aliis quam pluribus nobilibus viris in locum presignatum ad faciendam pariter et videndam ordinationem premissam confluentibus, ipsis etiam, scilicet regio et nostro hominibus [per] dictum dominum abbatem eidem ordinationi ob maiorem iustitie cautelam interesse rogatis presentibtis, cum ex conmissione et nutu prefatorum ordinatorum sepedictus dominus abbas metas memorate possessionis sue Polyan a parte possessionarie portionis prelibati Michaelis, Beche nomine, ostendere incepisset, mox idem Michael, pristinis suis temerariis actibus non contentus, ex preconcepti rancoris malitia super iobagiones dicti domini abbatis ipsum dominum eorum in ostensione ipsa metali precedentes manibus armatis et potentibus irruendo et ipsos verbis indecentibus per[tractando non tantum repulisset] verum etiam, prout a fidedignis ... diceretur pretactum dominum abbatem cum familiaribus suis enormiter ledere, occidere intendisset, nisi dominus banus, magister Iohannes, filius Thome et Thomas Kachar antedicti presumptionis huiusmodi intercepissent effectum; quapropter nec in facto metarum predictarum, neque super iniuriis prenotatis aliqua per ordinatores pretactos conpositio vel satisfactio ex parte predicti Michaelis fieri potuisset; qui etiam Michael coram eisdem ordinatoribus et nobilibus conprovincialibus ore proprio affirmasset se Stephano de Tevel, famulo predicti domini abbatis, per mactationem faciei, nulla tamen culpa eiusdem exigente, conminatum fuisse nuperrime et aliis ad eundem dominum abbatem spectantibus servitoribus ... [minas] continuas et terrores necis et lesure incusisset et incuteret manifeste. Datum in festo Beate Potentiane virginis anno Domini millesimo trecentesimo septuagesimo octavo. [1378. máj. 19.]