Amicis suis reverendis capitulo ecclesie Iauriensis comes Nicolaus de Zeech, iudex curie domini Lodovici, Dei gratia regis regis (!) Hungarie, comitatumque Posoniensem tenens pro honore, amicitiam paratam cum honore. Noveritis, quod dominus frater Paulus, abbas de Bel, personaliter iuxta continentiam regalium prorogatoriarum in octavis festi Beati Georgii martiris proxime preteritis [1381. máj. 1.] in figura nostri iudicii conparendo contra Stephanum, filium Petri, de Atya quasdam litteras conventus Sancti Martini Sacri Montis Pannonie formam possessionarie reambulationis, metarum renovationis, contradictorie inhibitionis et citationis in se denotantes domino nostro regi et secundum regium litteratorium preceptum rescriptionales, asserens actionem et propositionem suam litteris contineri in eisdem, nobis presentavit declarantes, quod, cum idem dominus abbas acceptis Mychaele, filii Fabiani, de Kouachi regis et fratre Iohanne sacerdote ipsius conventus hominibus die dominico proximo, videlicet in vigilia festi Assumptionis Virginis gloriose in anno Domini millesimo trecentesimo septuagesimo nono preterito [1379. aug. 14.] ad faciem possessionis sue Polian vocate vicinis et commetaneis suis universis inibi legitime convocatis accedendo et metas eiusdem reambulare, renovare voluissent, tunc Stephanus, filius Petri, de Atya illic personaliter conparendo ipsos ab huiusmodi metarum renovatione prohibuisset; quem idem regius et dicti conventus homines ibidem contra prelibatum dominum abbatem rationem sue prohibitionis redditurum ad octavas festi Beati Mychaelis archangeli tunc venturas [1379. okt. 6.] in regie maiestatis presentiam citavissent.||
Quibus quidem litteris exhibitis prefatus dominus abbas rationem premisse contradictionis, inhibitionis assignare postularat per Stephanum prenotatum. Quo percepto Petrus, filius Iohannis, pro ipso Stephano, filio Petri, cum procuratoriis litteris dicti conventus in nostram exurgendo presentiam responderat ex adverso, quod ipse premisse possessionarie reambulationis et metarum renovationis idem Stephanus pro eo fecisset prohibitionem prenotatam, quia idem dominus abbas per predictam suam possessionariam reambulationem et metarum renovationem magnam particulam terre de possessione predicti Stephani, filii Petri, Myhal vocatam occupare et ad possessionem suam Polyan aplicare voluisset, ipseque Stephanus, filius Petri, in facto dicte possessionis Myhald (!) litteralia haberet instrumenta in termino ulteriori per nos sibi dando coram nobis exhibenda.||
Unde nos perceptis premissis conmiseramus eo modo, ut idem Stephanus, filius Petri, universa sua litteralia instrumenta, si que in premissis haberet confecta in octavis festi Beati Iacobi apostoli tunc venturis [1381. aug. 1.] coram nobis exhibere teneretur, quibus visis iudicium et iustitiam facere valeremus inter partes in premissis. Tandem ipsis octavis occurrentibus prefatus dominus Paulus abbas personaliter ad nostram veniendo presentiam, presente dicto Petro, filio Iohannis, qui pro ipso Stephano, filio Petri, cum procuratoriis litteris dicti conventus coram nobis astabat, quoddam privilegium domini Geyse, olim regis Hungarie, in anno Domini millesimo centesimo sexagesimo secundo, indictione decima, regni autem sui vigesimo tertio [1162] emanatas nobis presentavit, in quibus inter alie hec clausula reperiebatur, quod Fulkmarus, filius Petri, fidelis spatarius ipsius domini Geyse regis rogasset eundem, ut preciperet abbati Apa Sancti Maurici ipsum suscipere inter filios ecclesie et hoc facto idem Fulkmarus fecisset donationem monasterio Sancti Maurici, videlicet dedisset predium Pulan cum duobus aratris [et tredecim equis indomitis, dedisset eliam ibidem tres bonos equos, tres pisscinas, viginti boves, triginta porcos, centum oves, quatuor mansionum homines, quorum nomina hec essent Berkes cum filio suo Sudan, Som cum tribus filiis suis Somo, Zuna, Quisid et Stephanum et Rua], cuius predii talis esset situs: de silva Keurus incipiens transiret ad sepulcrum, inde ascenderet et descenderet ad molam Surt, deinde verteretur ad silvam leprosorum et inde transiens per Egrugh extenderetur usque ad puteum et descenderet ad foveam vulpis et inde reverteretur ad predictum locum Keurus.||
Quibus quidem litteris exhibitis prefatus dominus abbas premissa per eundem Stephanum, exhibere assumpta instrumenta exhiberi postulavit per eundem. Quo audito prefatus procurator dicti Stephani in persona eiusdem respondit eo modo, quod licet prefatus Stephanus, filius Petri, de Atya in facto anotate possessionis sue Myhal instrumenta exhibere, ut premittitur assumpserit et quoddam privilegium Nicolai, filii Geleti, condam regni Hungarie palatini, super dicta possessione Myhal confectum exhibuerit, tamen quia idem privilegium nullam metam eiusdem possessionis in se continebat, nec aliquod aliud instrumentum metale ipsum Stephanum suus procurator habere asserebat, ideo partibus predictis per nos in premissis iuris equitatem impertiri postulantibus, quia absque reambulatione et metarum demonstratione possessionum partium predictarum partes inter easdem congruum iudicium facere non poteramus, pro eo vestram amicitiam presentibus petimus diligenter, quatenus vestros detis homines pro utrisque partibus pro testimonio fidedignos, quibus presentibus Paulus Rufus de Kisravazd vel Mychael, filius Petri, de Ech aut Benedictus, filius Mychaelis vel Andreas de Toryan seu Mychael, filius Fabiani, de Kovachi sive Stephanus vel Dominicus, filii Andree, de Ayka pro parte dicti domini abbatis actoris, item Iohannes, filius Buken, de Kovachi vel Iohandes, filius Laurentii, de eadem aut Nicolaus, filius Pauli, sive Nicolaus, filius Iohannis, de dicta Ayka, aliis absentibus homines regii in octavis festi Beati Mychaelis archangeli nunc venturis [1381. okt. 6.] et aliis diebus ad id aptis ad facies possessionum partium prescriptarum vicinis et conmetaneis ipsarum universis illic legitime convocatis et partibus vel earum legitimis procuratoriis presentibus accedendo, primo anotatam possessionem Polian ipsius domini abbatis per metas et cursus metales in dicto privilegio ipsius domini Geyse regis per eundem abbatem vel eius procuratorem legitimum inibi in specie exhibendo contentas et expressas iuxta demonstrationem domini abbatis vel eiusdem procuratoris legitimi a parte anotate possessionis Myhal ipsius in causam attracti reambulent et signis metalibus undique consignent; demum vero anotatam possessionem Myhal ipsius in causam attracti similiter per metas et cursus metales per eundem Stephanum, filium Petri, vel eius procuratorem legitimum ostendendas et demonstrandas a parte anotate possessionis Polyan ipsius actoris modo simili reambulent et signis metalibus undique consignent et si ipse partes in huiusmodi reambulationibus et metarum demonstrationibus concordes fierent, tunc cuilibet parti sua iura possessionaria evidentibus metis ab invicem distinguendo statuant et conmittant perpetuo possidenda; partibus autem in premissis discordantibus particulam vel particulas terrarum inter ipsas partes in lite remanentem vel remanentes signis metalibus undique consignando, regalique mensura mensurando, visis et circumspectis quibuslibet suis utilitatibus, qualitatibus et quantitatibus et proventibus Deo pre oculis habito una cum aliis probis viris estiment in condigno suo pretio et valore regni lege requirente et post hec ipsius possessionarie reambulationis, metarum ostensionis, consignationis, estimationis et statutionis seriem cum cursibus metarum, si necesse fuerit, ad octavum diem dictarum octavarum [1381. okt. 13.] domino nostro regi fideliter rescribatis. Datum in Visegrad, decimo die termini prenotati, anno Domini millesimo trecentesimo octogesimo primo. [1381. aug. 10.]||
[Hátulján:] Amicis suis reverendis capitulo ecclesie Iauriensis pro domino Paulo abbate de Beel contra Stephanum filium Petri de Athya super quadam possessionaria reambulatione metarum, ostensione, consignatione, statutione et estimatione per regios et vestros homines in octavis festi Beati Mychaelis archangeli faciendis et ad octavam diem dictarum octavarum ad iudicem.