Elizabeth, Dei gratia regina Hungarie, Polonie, Dalmatie etc., fideli suo magistro Akus, inter alios honores comiti de Bakon, salutem et gratiam. Datur nobis intelligi, quod in anno tertio iam transacto circi tempus carnisprivii [1382. febr. 20.] Thomas, tunc vicecomes vester Bokoniensis, quam plura tam abbatis de Beel propria, quam iobagionum suorum de Akol pecora potentionaliter et indebite auferendo ipsam villam Akol dampnifere et enormiter devastasset; ex quibus vos nonnulla postmodum reddi faciendo de reliquis nullam adhuc iustitiam fecissetis et insuper moderni vestri in dicto comitatu de Bokon officiales diversis occasionibus frivolis adinventis predictum abbatem et suos homines ab usu et utilitatibus silve Bokon tam in privilegiis dicti abbatis expressis, quam aliis, a quibus felicis memorie domini nostri Lodovici regis et priorum comitum de Bokon temporibus idem abbas et sua ecclesia nunquam prohibiti seu impediti fuissent, prohibendo impedire et gravare niterentur. Quo circa fidelitati vestre firmiter precipiendo mandamus, quatenus de premissis indebite ablatis predicto abbati et suis populis debitam iustitiam exhibentes, sibi et ad ipsum pertinentibus in iuribus prefate ecclesie et dicte silve usu ac utilitatibus, in quibus aliis et signanter predicti domini nostri regis temporibus pacifici extiterunt, nullam prestetis, nec inferi permittatis inpedimentum, quin potius ab aliis iniuriantibus vice nostre persone protegatis et defendatis eosdem. Secus in premissis sub obtentu nostre gratie non facturi et illud idem vestras vices gerentibus presentes inspecturis damus firmiter in mandatis, quas semper reddi precipimus presentanti. Datum Bude, feria sexta proxima ante dominicam Palmarum, anno Domini millesimo trecentesimo octogesimo quarto. [1384. ápr. 1.]