Subiugali ac humilima salutatione cum conplacenti obsequiorum promptitudine iugiter peranexis. Noveritis domine et fautor noster perhonorande pro fertilitate et utilitate nostri opidi seu civitati (!), nec non et pro melioratione et fructuositate vestri tributi ac telonii nundinas aut annuale forum in festo Beati Laurentii martiris nos inpetrando acquisivisse, acquirendo obtinuisse, ut deinceps perpetuis singulis annis in prenotato festo Beati Laurentii martiris in Baht (!) nundine sive annuale forum convenientibus et decedentibus celebrando peragatur ac patratur et super eandem donationem et inpetrationem littere regales confirmate et roborationis (!) nobis emanaverunt et porrecte extant. Quapropter vestram petimus gratiam et honestatem, de qua sedule gerimus confidentiam, quatemus pro subsidio et promotione nostri oppidi tantam liberam facultatem vel donum tale dignemini conferre ac concedere, quod quicunque libere conditionis homines ad predictum annuale forum veniunt, a tributo spatio octo dierum perfruantur libertate, videlicet quatuor dies ante festum Beati Laurentii et quatuor post secure et inpedite valeant accedere et abire queant absque gravamine et inpedimento, exceptis hominibus pergentibus et pertranseuntibus cum oneribus, de quibus tributum accipi licet. Si istud vestra probitas et gratia nobis donaverit et contulerit, quod vobis et vestre ecclesie signanter in lucrum et uberositatem erit et fiet, ex tunc una cum latore presentium litteras patentes vestro sigillo roboratas super eandem libertatem et largitionem nobis dignemini et velitis dirigere et translegere; pro quo vobis et vestratis promptiores nos fieri obligamus ac promereri et regratiari intendimus. Valete in eo, qui est omnium vera salus. Scriptum sub sigillo civitatis et conmunitatis. Iacobus iudex et iurati, nec non et tota conmunitas pauperum et divitum in Baht vestri humiles subditi.||
[Cím]: Venerabili viro Iohanni abbati ecclesie Sancti Mauricii ac Sociorum eius de Beel domino fautori eorum perhonorando littera detur.