Serenissimo principi domino Sigismundo, Dei gracia inclito regi Hungarie, Dalmacie, Croacie etc. marchionique Brandenburgensi etc., domino ipsorum gracioso conventus monasterii Sancti Martini de Sacro Monte Pannonie oraciones in Domino. Litteras vestre maiestatis introductorias pariter et statutorias noveritis nos supremo cum honore recepisse in hec verba:||
Sigismundus, Dei gracia rex Hungarie, Dalmacie, Croacie etc. marchioque Brandenburgensis etc. fidelibus suis, conventui ecclesie Sancti Martini Sacri Montis Pannonie salutem et graciam. Dicitur nobis in persona religiosi viri domini fratris Petri abbatis ecclesie Beatorum Petri et Pauli apostolorum de Tata, quod ipse in dominium quarundam porcionum possessionariarum suarum et dicti sui monasterii Alsofalu et Felsewfalu vocatarum, necnon iuris montani et terrarum arabilium ad easdem spectancium ac molendinorum super fluvio eiusdem civitatis Tata in sex locis habitorum, unius videlicet iuxta arborem piri supra molendinum domine abbatisse ecclesie Beate Virginis de Insula Strigoniensi, secundi prope locum antiqui molendini, qui Mochochyde diceretur, tercii Ochou vocati, cuius aque meatus interdum deficeret, quarti inferius supra eandem aquam similiter Ochou dictam iuxta magnam arborem et antiquam nyarfa nuncupatam, quinti in loco Vereskw vocato ad caput fontis calidi prope dictam civitatem Tata et sexti Henchmolna nominati super fluvio Fyzeg currentis ac quarundam terrarum arabilium Zenthmiklosfeulde et Zenthmargithaazzonfelde appellatarum, simul et pratorum, qui vulgo Mesterrethe, Sygeth et Erkecherethe dicerentur intra terminos et limites ipsius civitatis existencium, apud manus suas habitorum legitime vellet introire, si contradiccio cuiuspiam sibi non obviaret in hac parte. Super quo fidelitati vestre firmiter precipiendo mandamus, quatenus vestrum mittatis hominem pro testimonio fidedignum, quo presente Iohannes filius Nicolai de Galya vel Matheus de Kovachy aut Iacobus sive Nicolaus de Halap aliis absentibus homo noster ad facies dictarum porcionum possessionariarum et molendinorum ac terrarum arabilium et pratorum prenominatorum vicinis et commetaneis eorundem universis illuc legitime convocatis et presentibus accedendo introducat prefatum dominum fratrem Petrum abbatem in dominium eorundem statuatque eosdem cum universis suis utilitatibus et pertinenciis quibusvis eidem iure sibi incumbenti perpetuo possidendas, si non fuerit contradictum. Contradictores vero, si qui fuerint, citet eosdem contra annotatum dominum fratrem Petrum abbatem nostram in presenciam ad terminum competentem racionem contradiccionis eorum reddituros. Et post hec ipsarum introduccionis et statucionis cum nominibus contradictorum vel citatorum, si qui fuerint, terminoque assignato nobis fideliter rescribatis. Datum in Vyssegrad, feria quarta proxima post festum Nativitatis Beate Virginis Marie, anno Domini Mmo CCCmo LXXXmo octavo. [1388. szept. 9.]||
Nos igitur preceptis vestre maiestatis in omnibus obtemperare cupientes, ut tenemur, una cum prefato Nicolao de Halap homine vestro nostrum hominem, videlicet fratrem Nicolaum presbiterum, unum ex nobis ad premissa transmisimus exequenda pro testimonio fidedignum, qui demum exinde ad nos reversi nobis conformiter retulerunt, quod idem homo vester presente nostro testimonio, feria tercia proxima post festum Beati Gerardi martiris proxime preteritum [1388. szept. 29.] ad facies supradictarum porcionum possessionariarum Alsofalu et Felsewfalu vocatarum, necnon iuris montani ac molendinorum, terrarum arabilium et pratorum supraspecificatorum vicinis et commetaneis eorum universis illic legitime convocatis et presentibus [...] introduxisset prefatum dominum fratrem Petrum abbatem in dominium eorundem statuissetque eosdem eidem cum universis utilitatibus et pertinenciis quibusvis iure sibi incumbenti perp[etuo pos]sidendas nullo penitus contradictore apparente. Datum quintodecimo die diei statucionis prenotate, anno Domini supradicto. [1388. okt. 13.]