(M)agnifico viro domino Stephano, regni Hungarie palatino et iudici Comanorum, amico eorum reverendo, capitulum ecclesie Iauriensis cum orationum in Domino devotarum sufragio amicitie debitum et honoris perpetuum incrementum. Cum vestra sane noverit magnificentia, quod nos litteras vestras modum et formam vestre sententionarie deliberationis in se denotantes super reambulatione subscripti portionis possessionarie, metarum erectione et statutione pro religioso viro domino fratre Stephano, abbate ecclesie Sancti Martini de Sacro Monte Panonie, nobis directas debita recepimus cum reverentia et iuxta continentiam earundem una cum magistro Blasio, homine vestro de curia vestra ad hoc specialiter destinato, hominem nostrum, discretum videlicet virum magistrum Iohannem, socium et concanonicum nostrum, ad exequenda illa, que in prefatis litteris vestris exprimuntur, direximus pro testimonio fide dignum; qui tandem ad nos regressi conformiter nobis retulerunt, quod ipsi in quindenis festi Beati Mychaelis archangeli [1392. okt. 13.] ad faciem possessionis Dyenus vocate et per consequens cuiusdam particule terre litigiose in eadem Dyenus habite vicinis et conmetaneis suis universis inibi legitime convocatis ac religioso viro domino fratre Petro preposito, legitimo procuratore ipsius domini Stephani abbatis presentibus accessissent, ibique, habita prius legittima reambulatione eiusdem particule terre litigiose, eandemque particulam terre per Stephanum et Paulum, filios condam Iacobi, iudicis Posoniensis, occupatam secundum continentias litterarum nostrarum rescriptionalium metalium, pridem per procuratorem ipsius domini Stephani abbatis coram vobis productarum sub conclusione metarum in eisdem litteris expressarum metas eiusdem in locis necessariis non bene apparentes metis elevatis et erectis, ad dictam possessionem ipsius ecclesie Sancti Martini Dienus nuncupate applicando cum omnibus suis utilitatibus, videlicet cum ecclesie Sancti Martini, turri seu campanili lapideo et cemeterio cum muro circumdato ac septem sessionibus, una videlicet plebani et sex iobagionibus, necnon ortis pomorum seu fructuum in facie eiusdem terre litigiose existentibus prefate ecclesie Sancti Martini, Sacri Montis Panonie et per consequens dicto domino abbati iure eis incumbenti perpetuo posidere (!) statuissent et conmisissent contradictione ipsorum Pauli et Stephani et aliorum quorumlibet non obstante; cuius quidem particule terre litigiose mete sic reciperentur: quod primo de aqua Danubii egrediendo in litore eiusdem aque quatuor metas terreas antiquas reperissent, quarum quidem quatuor metarum unam earundem a parte ville Dyenus renovassent, de quibus egrediendo venissent ad quandam vallem versus orientem, que vallis a sinistris divederent (!) terram ville Myser a terra ville Dyenus nuncupate, ubi unam metam terream acumulassent; deinde in eadem valle procedendo tendissent ad aquilonem et sic in eadem valle per bonum spatium eundo reflexissent ad orientem, ubi similiter in margine eiusdem vallis a parte meridtiei similiter unam metam terream posuissent, de hinc valle in eodem procedendo reflexissent se ad meridiem, ubi in angulo marginis eiusdem vallis circa eandem reflexionem similiter unam metam terream acumulassent; ab hinc modice ad eandem plagam meridiei eundo et de ipsa valle exeuntes versus orientem in fine cuiusdam terre arabilis venissent ad quandam metam terream bene apparentem, que terras prefatarum possessionum videlicet a plaga meridiei terram ville Dyenus et a parte aquilonis ville Myser ab invicem separaret et circa eandem terram arabilem eundo ad orientem, quantum esset iactus unius lapidis, iterum pervenissent ad unam metam terream separantem terras villarum Myser et Dyenus ab aquilone ville Myser, a meridie vero ville Dyenus; de hinc ad eandem plagam eundo quantum ad ictum duarum sagittarum reperissent unam metam terream, deinde iterato eundo ad tantundem spatium iactus duarum sagittarum pervenissent similiter ad unam metam terream ac ab inde ad eandem plagam orientalem eundo ad longitudinem unius iugeris terre circa prefatam terram arabilem pervenissent ad marginem cuiusdam vallis in cuius superficie circa quoddam fosatum (!) unam maximam metam terream reperissent, deinde directe processissent ad orientem saliendo quendam fluvium Dunaaga vocatum retro villis Myser et Dyenus nuncupatas habitum, ubi in littore eiusdem esset fluvii una meta terrea, quas quidem metas propter apparentiam earundem statu in eodem permisissent; indeque ad eandem plagam orientalem procedendo versus ecclesiam Beati Martini in eadem villa Myser constructam, prope eandem ecclesiam invenissent a parte occidentis unam metam terream bene apparentem, quam renovassent, de hinc directo introisent (!) ad quandam magnum viam Posonyvt vocatam in medio eiusdem ville Myser existentem, quam pro metali distinctione statuissent, que quidem via reflecteretur versus meridiem ad quandam magnam metam, deinde ad eandem plagam orientalem transeundo ad spatium iactus unius lapidis pervenissent ad tres metas terreas angulares, quas modo simili statu in eodem in eodem (!) permisissent. Nos nichilominus presentis rei seriem petente supradicto domino abbate sub pendenti sigillo nostro vestre magnificentie duximus rescribendum. Datum octavo die quindenarum festi Beati Mychaelis archangeli predictarum, anno Domini millesimo trecentesimo nonagesimo secundo. [1392. okt. 20.]