Serenissimo principi domino Sigismundo, Dei gratia inclito regi Hungarie, Dalmatie, Croatie etc., marchionique Brandenburgensi etc. domino ipsorum gratioso conventus monasterii Sancti Martini de Sacro Monte Pannonie orationes in Domino debitas et devotas cum perpetua fidelitate. Vestra noverit serenitas, quod, cum nos receptis amicabiliter litteris viri magnifici comitis Frank de Zechen, iudicis curie vestre, adiudicatoriis pariter et evocatoriis pro domino fratre Martino, abbate ecclesie de Beel et conventu loci eiusdem contra Nicolaum, filium Thome, de Peech iuxta earumdem continentiam una cum Paulo de Rauasd, homine vestro, nostrum hominem videlicet dominum Dyonisium, presbiterum rectorem ecclesie nostre parochialis de Rauasd, ad infrascriptam evocationem faciendam transmisissemus pro testimonio fide dignum; tandem iidem exinde ad nos reversi nobis conformiter retulerunt, quod idem homo vester presente eodem nostro testimonio [feria sexta proxima post festum Epiphaniarum proxime preterita] [1400. jan. 9.] memoratum Nicolaum, filium Thome, de Peech in eadem possessione sua Peech ad ea, que in dictis litteris adiudicatoriis continentur perhemptorie responsurum, rationemque efficacem redditurum contra memoratum dominum abbatem ecclesie de Beel et conventum loci eiusdem ad octavas festi Purificationis Virginis gloriose nunc venturas [1400. febr. 9.] vestram evocasset in presentiam, Thomam familiarem et Benedictum villicum suos eidem statuere conmittendo. Datum tertio die evocationis prenotate, anno domini millesimo quadringentesimo. [1400. jan. 12.]