Serenissimo principi domino Sigismundo, Dei gratia Hungarie, Dalmatie, Croatie etc. regi illustri, marchionique Brandenburgensi etc. domino ipsorum metuendo capitulum ecclesie Wesprimiensis orationes in Domino debitas et devotas. Vestra noverit celsitudo, quod, cum nos omni cum reverentia, qua decuit, receptis litteris vestris annualibus pro religioso viro domino fratre Martino, abbate de Bel, ad citationes, inquisitiones, prohibitiones, necnon ad omnia alia, que iuxta regni vestri consuetudinem talibus in processibus fieri consueverunt, facienda ad anni circulum per vestram maiestatem datis et gratiose concessis, iuxta earumdem continentiam una cum Iohanne de Somuiragh, homine vestro inter alios homines vestros in dictis litteris vestris annualibus conscriptos nominaliter expresso, nostrum hominem, videlicet Michaelem, chori eiusdem ecclesie nostre clericum, ad infrascriptas inquisitionem et citationem faciendas pro nostro testimonio fide dignum duxissemus destinandum, demum iidem exinde ad nos reversi nobis concorditer retulerunt, quod predictus homo vester simul cum eodem nostro testimonio feria quarta proxima ante festum Beati regis Stephani proxime preteritum [1402. aug. 16.] in comitatu Wesprimiensi procedendo ab omnibus, quibus decuisset et licuisset, nobilibus videlicet et ignobilibus ac aliis cuiusvis status et conditionis dicti comitatus hominibus palam et occulte diligenter de infrascriptis investigando talem scivissent veritatem, quod Valentinus, filius Petri de Bere ex inqua (!) suggestione nobilis domine, matris sue circa festum Beati Michaelis archangeli proxime preteritum, [1401. szept. 29.] quoddam vas vini prelibati domini Martini abbatis simul cum curru et sex bobus eiusdem in territorio prelibate possessionis Kaiar nuncupate, domini nostri episcopi, insidiando auferri et deduci fecisset sua potentia et auctoritate propria mediante in preiudicium dicti domini abbatis valde magnum; factaque ipsa inquisitione prefatus homo vester presente prescripto nostro testimonio termino in eodem memoratum Valentinum, filium Petri et nobilem dominam in facie portionis ipsorum possessionarie in dicta possessione Kaiar vocata habite rationem premissorum reddituros contra annotatum dominum Martinum abbatem ad octavas festi Beati Michaelis archangeli nunc venturas [1402. okt. 6.] in vestre maiestatis presentiam citavisset. Datum sexto die diei inquisitionis et citationis antedictarum, anno Domini millesimo quadringentesimo secundo. [1402. aug. 21.]