Nos capitulum ecclesie Wesprimiensis memorie conmendamus, quod religiosus vir dominus frater Martinus, abbas monasterii Sancti Mauricii de Beel, sua et conventus eiusdem monasterii in personis ad nostram veniens presentiam per modum prohibitionis et protestationis nobis exponens declaravit, ut, sicut ipsi percepissent et etiam revera scirent, religiosi viri, domini, scilicet frater Petrus prior et conventus claustri Beati Mychaelis archangeli de Leweld, ordinis Cartusiensis, necnon Iohannes, filius Iohannis de Ayka in reambulatione possessionum ipsorum Ordoleweld et Gyepus vocatarum pridem, videlicet feria quinta proxima post festum Beati Barnabe apostoli de novo elapsum, [1401. jún. 15.] per modum conpositionis inter eos factam, quandam particulam terre ipsorum domini abbatis et conventus ac monasterii eorum Ethey et Endred nuncupatas, interque possessiones annotatorum domini abbatis et conventus ac monasterii ipsorum Borsod, Polyand appellatas adiacentes et ad easdem spectantes pro se occupassent et ad huiusmodi reambulationem ipsius et metarum erectionem potentialiter annectendo applicassent minus iuste in preiudicium eorumdem domi abbatis et conventus de Bel valde ingens; unde memorati dominus frater Martinus abbas et conventus sepefatos dominum Petrum et conventum de Leweld, Iohannemque, filium Iohannis, de Ayka et ceteros quosvis, sicut etiam tempore premissarum reambulationis et metarum erectionis antedictarum possessionum ipsorum et prenarratarum particularum terrarum eorum pro se occupatione ac ad antefatas reambulationes et metarum erectiones antedictarum possessionum ipsorum annectione, inclusione et applicatione factis vel fiendis prohibuisset, sic et nunc eosdem prohiberent, imo antelatus dominus frater Martinus abbas suo et prenotati conventus nominibus prelibatos Iohannem de Ayka et alios quoslibet tamquam absentes, ipsum dominum Petrum priorem facie ad faciem coram nobis repertum prohibuit contradicendo et contradixit inhibendo in premissis nostri in presentia harum vigore mediante, legeque regni requirente. Datum secundo die festi Beatorum Petri et Pauli apostolorum, anno Domini millesimo quadringentesimo secundo. [1402. jún. 30.]