Nos conventus monasterii Sancti Martini de Sacro Monte Pannonie memorie commendantes tenore presencium significamus, quibus expedit, universis, quod anno Domini Mo quadringentesimo octavo in dominica Letare religiosus vir, dominus Martinus abbas monasterii de Beel personaliter ad nostram veniendo presenciam exhibuit nobis quasdam litteras nostras patentes omni per usus vicio et suspicione carentes tenoris infrascripti petens cum instancia ut huiusmodi tenorem earundem litterarum nostris litteris inseri faciendo sub pendenti nostro sigillo sibi concederemus uberiorem rei ad cautelam, quod et fecimus testimonio presencium nostrarum litterarum privilegialium iusticia requirente, quarum quidem litterarum tenor de verbo ad verbum tale est:||
Nos, conventus monasterii Sancti Martini de Sacro Monte Pannonie memorie commendantes significamus, quibus expedit, per hec scripta, quod litteris regalibus omni, quo decuit, honore receptis in hec verba:||
Lodovicus Dei gracia rex Hungarie Polonie Dalmacie etc. fidelibus suis conventui monasterii Sancti Martini de Sacro Monte Pannonie salutem et graciam. Ex continencia litterarum magnifici principis domini Ladislai ducis Opulie et Volnensis regnique nostri Hungarie palatini et iudicis Comanorum nobis ostensarum informabamur evidenter, quod magister Iohannes filius Thome de Segvar in congregacione ipsius domini palatini universitati nobilium comitatus Vesprimiensis ultimo celebrata coram eodem domino palatino copiam cuiusdam privilegii domini regis Endre progenitoris nostri felicis memorie metas inter possessionem suam Gepes vocatam et terram monasterii de Beel Ethey nuncupatam distingentes in se continentis, religioso viro fratri Paulo abbati de Beel, dum et ubi per eundem requireretur, tradere promisisset, cum igitur, prout nobis exposuit idem abbas, dicti privilegii copia pro quorundam suorum iurium directione in brevi sibi sit admodum optima, fidelitati vestre firmiter precipiendo mandamus, quatenus vestrum mittatis hominem pro testimonio fidedignum, quo presente Thomas vel Petrus filii Pauli de Kyspeecz aut Briccius vel Iohannes filii Andree de Zenthiwan sive Iohannes filius Luce de Fenyeufeu seu Thomas filius Mychaelis de Gymolth aliis absentibus homo noster ad prefatum Iohannem filium Thome accedendo copiam memorati privilegii sub vestro vel alterius credibilis collegii sigillo prefato abbati tradi petat per eundem verbo nostre maiestatis, qui si fecerit, bene quidem, alioquin evocet ipsum Iohannem filium Thome contra prenotatum abbatem nostram in presenciam ad terminum competentem racionem non dacionis copie antedicte redditurum dictumque privilegium in specie producturum. Et tandem, quiquid idem Iohannes filius Thome fecerit, responderit aut fecerit, in premissis necnon predicti privilegii copie, si per ipsum data fuerit vel eciam si necesse fuerit, evocacionis seriem, prout fuerit oportunum, nobis fideliter rescribatis. Datum in Vyssegrad in festo Beate Scolastice virginis, anno Domini Mo CCCo LXXmo tercio.||
Unacum prescripto Thoma filio Michaelis de Gymolth homine regie serenitatis fratrem Nicolaum sacerdotem commonachum nostrum ad explenda obedienter premissa mandata regalia direximus pro testimonio fidedignum, qui demum ad nos reversi nobis uniformiter retulerunt, quod ipsi sexto die festi Pasche, videlicet feria sexta nunc preterita ad prelibatum magistrum Iohannem filium Thome in castro suo Segwar appellato personaliter repertum insimul accessissent, qui quidem magister Iohannes, ut pretacti privilegii copiam premissam predicto domino Paulo abbati illic tunc presenti et astanti traderet, verbo regie celsitu dinis requisitus sollicite per eosdem tandem quoddam privilegium pretitulati domini regis Endre nulla penitus suspicione corruptum sed integrum per omnia et autenticum iamdicti domini abbatis ac regii et nostri hominum predictorum manibus in specie tradidisset, ut excepta tenoris eius copia sibi illud restituerent sine mora, asserens nichilominus se paratum idem privilegium, si et ubi oportunum existeret, pro eodem domino abbate et sua ecclesia specietenus producturum, cuius quidem privilegii tenoris seu copie ordo, prout in quadam cedula papirea per sepedictos regium et nostrum homines nobis exinde allata reperimus contineri, per omnia dinoscitur esse talis:||
In nomine Sancte Trinitatis et individue Unitatis. Andreas, Dei gracia Hungarie, Dalmacie, Croacie, Rame, Servie, Gallicie Lodomerieque rex in perpetuum. Regie serenitatis munificencia illos merito largioris gracie prerogativa pre ceteris amplexatur, quorum fidelis servicii sedulitas cum sanguinis sui effusione tam regi quam regno commendabilis esse probatur. Hinc est, quod nos fidele servicium trium fratrum, scilicet Farkasii, Petri et Iohannis, recolentes, quod nobis tam in regno quam extra regnum fideliter exhibuerunt et precipue quod pro utilitate tocius regni in Ruscia morti predicti duo fratres, videlicet Farkasius et Petrus succubuerunt, fratri eorum scilicet Iohanni et suis heredibus in recompensacionem laborum suorum iure hereditario per fidelem pristaldum nostrum Sol comitem silvam Gepus nomine contulimus in perpetuum possidendam. Cuius terre prima meta incipit a Berinde sub arbore Gerteanfa, secunda meta de eadem villa Berinde, in qua est salix. Tercia meta est, ubi aqua quedam nomine Turna et aqua nomine Gepus insimul fluunt ex parte Myky. Quarta meta est ex parte Bokan et quinta ex parte eiusdem Bokon, in qua est arbor magna nomie Tulfa. Sexta est iuxta monticulum nomine Tubed et ex parte predicti Bokon, in qua est Egurfa. Septima est ex parte Endred, in qua est Tulfa. Octava est ex parte eiusdem Endred, in qua est salix. Nona est apud Huzeupagu et ex parte supradicti Endred, in qua est salix. Decima est ex parte Endred in capite Gepus, quam fecit comes palatinus, ubi silva remanet inter metas Petri comitis et terre arabiles inter metas Endred. Undecima est in fine ex parte Ethey ville sub Egurfa, duodecima de eadem villa sub arbore querci, quam Sol comes fecit. Terciadecima ex parte eiusdem Ethey iuxta viam, que nuncupatur Latina via sub Ihorfa. Quartadecima est, ubi de via Latina divertitur in magnam viam ex parte Modian sub Tulfa. Quintadecima est iuxta predictam magnam plateam ex parte Modian sub arbore quercus, ubi est Sudankereky. Sextadecima est ex parte Modian sub arbore quercus. XVII est ex parte Modian sub piro. XVIII est ex parte Modian sub arbore quercus. XIX vadit de Breinde via molendinaria sub arbore Tulfa. Vicesima est de eadem villa Berinde sub arbore nomine Berkenya. Uti autem hec a nobis facta donacio nullis umquam temporibus valeat retractari, presentem paginam supradicto Iohanni concessimus sigilli nostri testimonio roboratam. Datum per manus magistri Thome aule regie cancellarii et Cybiniensis et Vesprimiensis prepositi anno ab Incarnacione Domini Mo CCo XIIo venerabili Iohanne Strigoniensi archiepiscopo, reverendo Bertoldo Colocensi electo et bano existentibus, Calano Quinqueecclesiensi, Bolezlao Vaciensi, Cathapano Agriensi, Symone Varadiensi, Desiderio Chenadiensi, Vilhelmo Transsilvano, Petro Geuriensi, Ruberto Vesprimiensi ecclesias feliciter gubernantibus, Poth palatino et Musuniensi comite, Michaele voyvoda existentibus, Petro Bachiensi, Iula Budrugiensi, Bancone Byhoriensi, et curiali comite regine, Marcello Keveiensi et curiali comite Nicolao Posoniensi comitibus, regni nostri anno septimo.||
Unde nos conventus, qui supra, recepta regii et nostri hominum prescriptorum relacione premissa simul cum cedula prenotata tenorem eiusdem omnimodum quavis variacione reiecta ad iustam peticionem prenominati domini abbatis presentibus litteris nostris inseri fecimus transscribendo sigillique nostri autentici affixione muniri. Datum feria quarta proxima post octavas festi Pasche supradicti, anno Domini Mo CCCo septuagesimo octavo.