Serenissimo principi domino ipsorum, domino Sigismundo, Dei gratia inclito regi Hungarie, Dalmatie, Croatie etc., marchionique Brandenburgensi ac sacri Romani imperii vicario generali et regni Bohemie gubernatori conventus monasterii Sancti Mychaelis archangeli de Chorna orationum suffragia devotarum. Litteras vestre serenitatis vobis directas honore, quo decuit recepimus in hec verba:||
Sigismundus, Dei gratia rex Hungarie, Dalmatie, Croatie etc., marchioque Brandenburgensis etc., sacri Romani imperii vicarius generalis et regni Bohemie gubernator, fidelibus suis conventui ecclesie de Chorna salutem et gratiam. Dicitur nobis in persona religiosi viri domini fratris Martini, abbatis de Bel, quod quedam particule terre sue Zalmadi vocata, in comitatu Soproniensi existens, apud manus alienas occupative habita legitimam recaptivationem et sibi ipsi statuifactionem plurimum indigeret. Super quo fidelitati vestre firmiter precipiendo mandamus, quatenus vestrum mittatis hominem pro testimonio fide dignum, quo presente Nicolaus Bondor vel Georgius, filius eiusdem, de Paztor aut Vincentius sive Zambo de Sebehaza, aliis absentibus homo noster ad faciem predicte terre Zalmad vocate, vicinis et conmetaneis eiusdem universis inibi legitime convocatis et presentibus accedendo recaptivet eandem nomine iuris ipsius monasterii de Bel, recaptivatamque et ab aliorum iuribus possessionariis separatam et distinctam relinquat et et (!) statuat eandem ipsi monasterio et per consequens dicto domino Martino abbati cum omnibus suis utilitatibus et pertinentiis iure sibi incumbenti perpetuo possidendam, si non fuerit contradictum. Contradictores vero, si qui fuerint, citet eosdem contra annotatum dominum Maitinum abbatem nostram in presentiam ad terminum conpetentem rationem contradictionis eorum reddituros. Et post hec ipsarum recaptivationis et statutionis seriem cum nominibus contradictorum et citatorum, si qui fuerint, terminoque assignato nobis fideliter rescribatis. Datum Bude, die dominica proxime ante festum Beati Martini confessoris, anno Domino millesimo quadringentesimo nono. [1409. nov. 10.]||
Nos igitur mandatis vestre excellentie obedire cupientes, ut tenemur, una cum prefato Georgio, filio Nicolai Bondor, de Paztor, homine vestre maiestatis, unum ex nobis, videlicet fratrem Vatentinum subdyaconum, ad premissa exequenda nostro pro testimonio transmisimus fide dignum. Qui tandem exinde ad nos reversi nobis uniformiter retulerunt, quod ipsi feria tertia proxima ante diem Strenarum de novo elapsa [1409. dec. 13.] ad faciem predicte particule terre Zalmad vocate, vicinis et conmetaneis eiusdem universis inibi legitime convocatis et presentibus accessissent et cum ipsi eandem nomine iuris predicti monasterii de Bel recaptivare, recaptivatamque et ab aliorum iuribus possessionariis separatam et distinctam eidem monasterio et per consequens memorato domino Martino abbati iure sibi incumbenti relinquere et statuere voluissent perpetuo possidendam, tunc discretus vir dominus Nicolaus, plebanus de Bagyok, in persona reverendi in Christo patris domini Iohannis, episcopi ecclesie Iauriensis, inibi adherendo contradictionis velamine ipsis obviasset, propter quod ipsi die et loco in pretactis eundem dominum Iohannem episcopum contra annotatum dominum fratrem Martinum abbatem ad octavas festi Purificationis Beate Marie virginis nunc venturas [1410. febr. 9.] vestre sublimitatis in presentiam citavissent rationem contradictionis sue redditurum. Datum quarto die diei citationis prenotate, anno Domini millesimo quadringentesimo decimo. [1410. jan. 3.]