Magnifico viro domino Nicolao de Gara, regni Hungarie palatino et iudici Comanorum, amico ipsorum honorando capitulum ecclesie Vesprimiensis amicitiam paratam cum honore. Vestra noverit magnificentia, quod, cum nos omni cum reverentia, qua decuit, acceptis litteris serenissimi principis domini Sigismundi, Dei gratia Romanorum regis semper augusti, necnon Hungarie, Dalmatie, Croatie etc. regis, marchionisque Brandenburgensis etc., mediocri sigillo suo solito consignitis pro religioso viro domino fratre Martino, abbate monasterii Sancti Mauricii de Beel ad citationes, inquisitiones et prohibitiones, necnon ad omnia alia, qua iuxta regni sui consuetudinem talibus in processibus consueverint facienda per anni circulum generaliter datis et gratiose concessis, nobisque preceptorie transmissis, iuxta earumdem continentiam una cum Iohanne de Somvyragh, homine regio, inter alios homines suos in dictis litteris suis annualibus conscriptos nominaliter expresso, nostrum hominem, videlicet discretum virum dominum Stephanum magistrum, chori eiusdem ecclesie nostre presbiterum, ad infrascriptam inquisitionem faciendam pro nostro testimonio fide dignum duxissemus destinandum, demum iidem exinde ad nos reversi nobis voce consona retulerunt, ut prelibatus homo regius simul cum eodem nostro testimonio feria quarta proxima post festum Beati Georgii martiris proxime preteritum [1411. ápr. 29.] in comitatu Vesprimiensi procedendo ab omnibus, quibus decuisset et licuisset, nobilibus videlicet et ignobilibus ac aliis cuiusvis status et conditionis dicti comitatus hominibus palam et occulte diligenter de subscriptis investigando, talem scivissent veritatem, quod Thomas de Koromzo, Andreas de Symigh et alter Andreas de Beren, iudices nobilium comitatus Iauriensis, in reprobum sensum dati hiis diebus proxime preteritis contra et adversus prefatum dominum Martinum abbatem quandam litem fraudulenter et false emanari faciendo comiti dicti comitatus Iauriensis, castellano castri Sancti Martini de Sacro Monte Pannonie, dedissent et assignassent. Super eo videlicet, ut quidam nobiles, videlicet Demetrius de Zenthywan, Petrus de Repas, Martinus de eadem et Nicolaus de Gych, hoc coram ipsis fassi extitissent, quod ipse dominus Martinus abbas una cum ipsis comite et castellano pro libertate quorumdam iobagionum suorum per Lucam dictum Weres de Kysrowas detentorum quandam conventionem pecuniariam fecissent; cum tamen annotatus dominus Martinus abbas nequaquam in facto premisso cum predictis comite et castellano conventionem aliquam pecuniariam fecisset. Datum sexto die inquisitionis prenotate, anno Domini millesimo quadringentesimo undecimo. [1411. máj. 4.]