Relatio Styborii wayvode Transsilvanensis.||
Nos Sigismundus, Dei gratia Romanorum rex semper augustus ac Hungarie etc. rex memorie commendamus per presentes, quod nos consideratis fidelitatibus et fidelium servitiorum gratuitis meritis fidelis nostri devoti, dilecti reverendi in Christo patris domini Andree, archiepiscopi Spalatensis, commendatoris et gubernatoris abbatie Sancti Mauricii de Beel, ordinis Sancti Benedicti, etiam utilitatem et comodum regni nostri attendentes ad quandam possessionem eiusdem monasterii Sancti Mauricii Ganna nuncupatam, in comitatu Vesprimiensi habitam, forum liberum singulis quartis feriis in qualibet ebdomada in omnibus successivis annis celebrandum annuendo gratiose duximus concedendum, absque tamen preiudicio fororum comprovincialium aliorum. Quocirca vos universos mercatores et alterius cuiusvis status et conditionis homines cum mercibus et rebus mercimonialibus accedentes presentium serie affidamus, certificamus et assecuramus, quatenus cum vestris mercantiis et rebus mercimonialibus quibusvis ad dictum forum ebdomadale in annotata possessione Ganna vocata per nos modo quo supra perpetue celebrari conmissum libere veniatis et secure ibidem negotiationibus et mercantiis vestris in emptionibus et venditionibus expeditis et peractis ad propria vel alia, quo malueritis, loca absque aliquo metu et perturbatione recedatis salvis vestris cunctis rebus et personis sub nostra protectione et tutela speciali, presentium nostrarum litterarum et testimonio mediante. Et hec volumus per fora et alia loca publica palam facere proclamare. Presentes quoque sigillo nostro maiori, quo ut rex Hungarie utimur fecimus consignari. Datum Bude, feria tertia proxima post festum Epiphanyarum Domini, anno eiusdem millesimo quadringentesimo duodecimo, regnorum autem nostrorum anno Hungarie etc. XXIIII-to, Romanorum vero secundo. [1412. jan. 12.]