Magnifico viro Nicolao de Gara, regni Hungarie palatino et iudici Comarorum, domino et amico ipsorum honorando conventus monasterii Sancti Benedicti de Iuxtagron sincere reverentie et honoris continuum incrementum. Vestra noverit magnificentia nos litteras (!) serenissimi principis domini nostri Sigismundi, Dei gratia Romanorum regis ac Hungarie etc. regis annualibus pro parte reverendissimi in Christo patris Andree archiepiscopi Spalatensis, gubernatorisque monasterii Beati Mauricii de Beel in Bakonio silva et conventus loci eiusdem ad inquisitiones, citationes, prohibitiones et alia omnia, que talibus in processibus iuxta regni Hungarie consuetudinem fieri consueverunt, gratiose datas et concessas nobis presentatis (!), per nosque sumpmo honore receptis una cum Andrea, filio Dionysii, de Sember, homine regio in dictis litteris annualibus inter alios homines regis nominatim conscripto, nostrum hominem, videlicet religiosum virum fratrem Thomam sacerdotem, unum ex nobis ad infrascriptam inquisitionem faciendam nostro pro testimonio transmisimus fide dignum. Qui demum exinde ad nos reversi nobis concorditer retulerunt, quod ipsi in festo Beate Elizabethe regine proxime preterite [1419. nov. 19.] in comitatu Hontensi simul procedendo ab omnibus, quibus decuisset et licuisset, palam et oculte diligenter inquirendo talem de infrascriptis scivissent veritatem, quomodo magnificus vir dominus Petrus Cheh de Lewa, pridem agazonum regalium magister, quoddam tributum prescripti monasterii de Beel in oppido Baath seu Forum Regine vocatum (!) ac aliis in duobus locis, videlicet villis Almas et Solmus vocatis, exigi consuetum ad dictum tributum capitale in dicta Baath habitum pertinentibus, in comitatu Hontensi predicto existentibus, minus iuste et indebite sine conmissione et anuentia prefati domini archiepiscopi et gubernatoris prescripti monasterii de Beel et conventus loci eiusdem permissione pro se occupasset, occupatasque (!) conservaret et uteretur de presenti in preiudicium annotati domini gubernatoris et conventus et per consequens prescripti monasterii eorumdem de Beel potentia sua mediante. Datum quarto die diei inquisitionis prenotate, anno Domini millesimo quadringentesimo decimo nono. [1419. nov. 22.]