Nos capitulum ecclesie Posoniensis memorie commendamus, quod Dominicus Parvus, tributarius in tributo Dwrnmawt dicto extra muros civitatis Posoniensis existenti per reverendum in Christo patrem dominum Iohannem, episcopum Wladislawiensem necnon gubernatorem abbacie Sancti Martini de Sacro Monte Pannonie et conventum loci eiusdem constitutus, ad nostram cum procuratoriis literis eiusdem conventus veniens presenciam nominibus et in personis dictorum domini episcopi et conventus per modum protestacionis nobis significare curavit, quomodo Caspar Ventur et Fridericus dictus Haberstorfer cives civitatis dicte Posoniensis a festo Beate Dorothee virginis et martyris proxime preterito, [1420. febr. 6.] quandam porcionem annotatorum domini episcopi et conventus in telonio seu tributo penes turrim Wasserturm vocatam in predicto Posonio in Bedricia existentem ab hominibus pedestribus per navigium ibidem habitum transeuntibus ab antiquo exigi consueto ipsos dominum episcopum et conventum concernentem occupando pro se ipsis usurpare niterentur, prout et adhuc erga se potencialiter tenuissent et retinerent de presenti. Facta itaque huiusmodi protestacione prefatus Dominicus Parvus nomine procuratorio prescripto memoratos Caspar et Fridricum ab ulteriori occupacione usurpacione, detencione prescripte porcionis tributi predicti iam fatis domino episcopo et conventui provenire debentis prohibuit contradicendo et contradixit inhibendo coram nobis testimonio presencium mediante. Datum feria sexta proxima ante dominicam Iudica anno Domini MCCCCXX. [1420. márc. 22.]