Serenissimo principi domino Sigisniundo, Dei gratia Romanorum regi semper augusto ac Hungarie, Bohemie, Dalmatie, Croatie etc. regi, domino ipsorum naturali conventus monasterii Sancti Martini Sacri Montis Pannonie orationes in Domino. Vestra noverit serenitas nos litteras vestras sumpma cum obedientia recepisse in hec verba:||
Sigismundus, Dei gratia Romanorum rex semper augustus ac Hungarie, Bohemie, Dalmatie, Croatie etc. rex, fidelibus suis conventui ecclesie Sancti Martini Sacri Montis Pannonie salutem et gratiam. Dicitur nobis in personis religiosorum virorum domini fratris Michaelis, abbatis de Beel et conventus loci eiusdem, quomodo religiosus vir dominus frater Andreas, abbas monasterii de Czyrcz, circa festum Undecim Milium Virginum proxime preteritum, [1422. okt. 21.] nescitur quo ductus temeritatis presumptione, equos suos proprios equitiales, necnon et familiarium et iobagionum suorum de dicta Czyrcz ad prata seu fenilia dictorum domini Michaelis abbatis et sui conventus ad possessionem ipsorum Akol vocate spectantia pelli et minari fecisset, eademque prata et fenilia conculcari, spargi, abuti pro usu animalium iobagionum dictorum domini Michaelis abbatis et sui conventus de dicta Akol spectantia et anichilari fecisset; eo non contentus in festo Beatorum Symonis et Iude apostolorum similiter proxime elapso [1422. okt. 28.] missis et destinatis nonnullis familiaribus et iobagionibus suis, videlicet Marco de Tewely, Paulo clavigero de Cyrcz, Demetrio, filio Stephani, de eadem, Michaele, filio Bartholomei, de Soly, Blasio de Akly, Georgio iudice de dicta Czyrcz, item Benedicto Parvo, Nicolao Tawyz, Stephano Wagow, Nicolao, filio Ladizlai, Paulo de Weny dicto, Briccio, filio Nicolai, Demetrio, filio Thome, Iacobo, filio Iohannis, Petro, filio Nicolai, Iohanne Herczegh dicto, Iohannes (!) dicto Nemez, Georgio, filio Sebwk, Iacobo, Petro dicto Tymar, Nicolai dicto Vitez, Nicolao, filio Thome, Petro, filio Iacobi, Cosma, filio Demetrii, Cosma, Georgio dictis Tot, Mathia dicto Kegyes, Gallo villico, Ladizlao, filio Georgii, Laurentio, filio Stephani, Clemente, filio Petri, Gregorio, filio Nicolai, Valentino, filio Georgii, Nicolao Pogachy, Nicolao Weres, Petro carpentario, Symone, filio Dominici, Bartholomeo, filio Michaelis, Nicolao, filio Pauli, Stephano, filio Wyda, Francisco dolatore, Stephano, filio Ladizlai, Dominico, filio eiusdem, Benedicto Fekete dicto, Georgio Wegh, Dominico, filii Iacobi, Thoma dicto Wagow, Demetrio Myllan dicto in eadem Cyrcz conmorantibus manibus armatis et potentiariis ad prata seu fenilia prope monasterium Belense antedictum existentia, ubi familiares eiusdem domini abbatis in pascendis equis eiusdem fuissent constituti irruentes, ibidem unum equum familiaris eiusdem domini Michaelis abbatis ac alios quatuor equos abduxissent potentia mediante in preiudiciorum dictorum domini Michaelis abbatis et sui conventus valde magnum. Super quo fidelitati vestre firmiter precidiendo mandamus, quatenus vestrum mittatis hominem pro testimonio fide dignum, quo presente Franciscus seu Dominicus neve Georgius vel Nicolaus de Gych, aliis absentibus homo noster ab omnibus, quibus incumbit, meram de premissis experiatur veritatem; expertaque premissorum mera veritate evocet prefatum dominum Andream, abbatem de dicta Czyrcz, contra annotatum dominum Michaelem abbatem ad terminum conpetentem rationem de premissis redditurum, litis pendentia, si qua foret inter ipsos, non obstante, predictos familiares et iobagiones eiusdem eidem statuere conmittendo et post hec ipsarum inquisitionis et evocationis seriem cum nominibus evocati et statuere conmissorum, terminoque assignato nobis fideliter rescribatis. Datum Bude in festo Beati Emerici ducis et confessoris, anno Domini millesimo quadringentesimo vigesimo secundo. [1422. nov. 5.]||
Unde nos mandatis vestre serenitatis in omnibus obedire cupientes, ut tenemur, una cum predicto Francisco de Gych, homine vestro, nostrum misimus hominem videlicet religiosum virum fratrem Nicolaum sacerdotem, unum ex nobis ad premissa peragenda pro testimonio transmisimus fide dignum. Qui tandem exinde ad nos regressi nobis uniformiter retulerunt, quomodo ipsi in festo Beati Clementis papa et martiris proxime preterite [1422. nov. 23.] in comitatu Wesprimiensi simul procedendo a nobilibus et ignobilibus ac alterius cuiusvis status et conditionis conprovincialibus dicti comitatus Wesprimiensis hominibus, a quibus decens et oportunum fuisset, palam et oculte diligenter inquirendo omnia premissa et quevis premissorum singula sic et eatenus facta esse rescivissent, quemadmodum vestre dictum extitisset serenitati; scitaque premissorum mera veritate tertio die diei dicte inquisitionis [1422. nov. 25.] prefatum dominum Andream abbatem de sepefata Cyrcz contra annotatum dominum Michaelem, abbatem de Beel, ad octavas festi Epiphaniarum Domini proxime affuturas [1423. jan. 13.] super possessione sua teloniaria in civitate Iauriensi exigi consueta vestre serenitatis evocassent in presentiam rationem de premissis redditurum, litis pendentia, si qua foret inter ipsos, non obstante, premissos familiares et iobagiones eiusdem eidem statuere conmittendo. Datum quinto die diei evocationis antedicte, anno Domini supradicto. [1422. nov. 19.]