Nobili viro Gregorio dicto Waryw de Meger, vicecomiti comitatus Iauriensis, amico ipsorum honorando conventus monasterii Sancti Martini Sacri Montis Panonie amiciciam paratam cum honore. Noverit vestra amicicia nos litteras vestras inquisicionarias pariter et evocatorias nobis directas honore, quo decuit et licuit recepisse in hec verba:||
Amicis suis reverendis, conventui ecclesie Sancti Martini Sacri Montis Panonie Gregorius dictus Waryw de Meger, vicecomes comitatus Iauriensis amiciciam paratam cum honore. Dicit nobis religiosus vir dominus frater Michael abbas ecclesie Beati Mauricii de Beel, quomodo Iohannes de Thewel officialis nobilium Blasii, Stephani et Michaelis per eosdem in porcione ipsorum possessionaria in Kyspech constitutus, feria quinta proxima ante festum Beati Clementis pape quendam iobagionem eiusdem domini abbatis, videlicet Petrum in possessione sua Kayar vocata residentem ex voluntate Mychaelis Kardus vilici, Benedicti Ispan, Alberti, Iohannis Korlath, Francisci, Andree Parvi, Petri filii Francisci, Demetrii vilici, Anthonii filii Blasii, Clementis Parvi, Mathye et Michaelis filii eiusdem, Ladislai dicti Fodor iobagionum ipsorum Blasii, Stephani et Mychaelis in porcione ipsorum possessionaria, in eadem Kyspech commorantium captivasset et in captivitate ac in vinculis viginti unum diebus conservasset, ymmo in nostra sede iudiciaria memoratus Iohannes de Thewely ex proprio ore suo coram nobis fassus extitit captivacionem predictam, insuper omnia bona sua pro tunc erga ipsum habita ab eodem recipi fecisset potencia mediante in preiudicium ipsius domini abbatis valde magnum. Unde requirimus vestram amiciciam, quatenus vestrum mittatis hominem pro testimonio fidedignum, quo presente Martinus filius Luce de Kysrowazd vel Stephanus filius Lorandi de eadem aut Emericus Teremes de Felpech sew Michael de Nema aliis absentibus homo regius ab omnibus, quibus incumbit, meram de premissis experiatur veritatem scitaque premissorum veritate annotatum Iohannem de Thewly officialem filii Blasii, Stephani et Michaelis Baroth, item memoratum Blasyum Baroth et alios, quo supra, ad sabbatum proximum post festum Epiphaniarum Domini proxime venturum contra prefatum dominum Michaelem abbatem nostram citet in presenciam, prefatos eciam iobagiones eiusdem Blasii Baroth in dicta porcione sua possessionaria Kyspech commorantes eidem statuere committendo et post hec huiusmodi inquisicionis et citacionis seriem nobis amicabiliter rescribatis. Datum secundo die festi Circumcisionis Domini, anno Domini Mo CCCCmo vigesimo sexto.||
Nos itaque amicabilibus peticionibus vestris annuentes, ut tenemur, una cum prefato Emerico Teremes de Felpech homine regio nostrum hominem, videlicet fratrem Gregorium sacerdotem socium nostrum conventualem ad premissa exequenda nostro pro testimonio duximus destinandum, qui demum exinde ad nos reversi nobis consona voce retulerunt, quod ipsi feria sexta proxima post festum Circumcisionis Domini proxime preteritum in comitatu Iauriensi procedendo ab omnibus, quibus decuisset et licuisset, nobilibus videlicet et ignobilibus ac ab aliis cuiusvis status et condicionis dicti comitatus hominibus palam et occulte diligenterque inquirendo eciam premissa et quevis premissorum singula sic et eatenus facta esse rescivissent, quemadmodum vestre dictum extitisset amicicie et tenor litterarum vestrarum per omnia continet prescriptarum scitaque premissorum mera veritate eodem die prefatum Blasium dictum Baroth in porcione sua possessionaria Kyspech vocata, Iohannem de Thewli in suo officiolatu in eadem Kyspech habita contra religiosum virum dominum fratrem Mychaelem abbatem de Beel ad sabbatum post festum Epiphaniarum Domini proxime preteritum in vestram citavissent presenciam, prefatos eciam iobagiones dicti Blasii eidem Blasio statuere committendo. Datum quinto die diei inquisicionis et citacionis premissarum, anno Domini, quo supra.||
[Külzetén:] Pro religioso viro, domino fratre Michaele, abbate de Beel contra Iohannem de Thewel ac alios inscriptos inquisicionis et citacionis relacio.||
[Hátán:] Pro actore Franciscus de Gech cum procuratoriis conventus Sancti Martini. Pro in causam attracto Iohannes de Thewel pro se et pro Blasyo Baroth domino suo sine litteris procuratoriis et pro iobagionibus statui commissis.